Ismaila Sarr azua kizaazaa Crystal Palace, ataka kujiunga na Liverpool

Mvutano wa bei waendelea

Klabu ya Crystal Palace imeweka wazi kiasi cha pesa wanachohitaji ili kumwachia winga wao tegemeo, Ismaila Sarr, kujiunga na Liverpool kabla ya dirisha la usajili kufungwa. Inaelezwa kuwa Palace wanahitaji kiasi cha pauni milioni 75 ili kumruhusu staa huyo kuondoka.

Taarifa zinaeleza kuwa Crystal Palace wamekasirishwa na muda huu wa mwisho wa dirisha la usajili, kwani hawakupenda kupoteza mchezaji muhimu kama Sarr kwa haraka kiasi hicho. Hali hii imeifanya klabu hiyo kuvuta miguu kwenye mazungumzo huku wakijaribu kuongeza bei ili kuwakatisha tamaa Liverpool.

Sarr agoma mazoezi

Hali imekuwa ya moto kufuatia ripoti kutoka kwa mwandishi Santi Aouna, ambaye amethibitisha kuwa Sarr amechukua uamuzi mzito wa kugomea mazoezi ya klabu yake ya sasa. Inasemekana mchezaji huyo raia wa Senegal hataki tena kuichezea Crystal Palace na anashinikiza dili hilo kukamilika haraka.

“Crystal Palace inahitaji pauni milioni 75 kutoka kwa Liverpool kwa ajili ya Ismaïla Sarr. Klabu hiyo ya London haina furaha kulazimika kuuza mchezaji wake katika siku ya mwisho ya usajili, hivyo wanachelewesha mazungumzo ili kupandisha dau. Kwa upande wake, Sarr anaishinikiza Crystal Palace; amegoma kufanya mazoezi na hataki kuchezea klabu hiyo tena,” ilieleza taarifa ya Aouna.

Mkakati wa Liverpool

Liverpool kwa sasa wako kwenye harakati za kuimarisha safu yao ya ushambuliaji baada ya kuonekana kuwa na nia ya kumuuza Cody Gakpo kwenda Manchester City kwa dau la pauni milioni 85. Ili kuziba pengo hilo, Liverpool wamekuwa wakimwinda mshambuliaji mwenye uwezo wa kucheza pembeni, na Sarr anaonekana kuwa chaguo lao kuu baada ya majaribio yao ya kumsajili Yankuba Minteh kutoka Brighton kugonga mwamba kutokana na bei ya pauni milioni 80.

Inafahamika kuwa Liverpool tayari walishawasilisha ofa ya pauni milioni 50 kwa ajili ya Sarr, ofa ambayo ilikataliwa mara moja na Palace. Sasa, “The Reds” wako kwenye mchakato wa kuamua kama watafikia dau hilo la pauni milioni 75 linalotakiwa ili kukamilisha usajili huo kabla ya saa za mwisho za dirisha la usajili.

Sarr alikuwa na msimu mzuri sana mwaka jana, akifunga mabao 21 katika mechi 45 alizocheza kwenye mashindano yote, jambo linalomfanya kuwa mchezaji muhimu anayetafutwa na vigogo hao wa Anfield.