Jamie Carragher aibua mjadala mzito kuhusu JJ Gabriel na Manchester United

Carragher aichambua hali ya JJ Gabriel

Mkongwe wa Liverpool na mchambuzi wa soka, Jamie Carragher, ametoa maoni yake kuhusiana na sintofahamu inayomkabili mshambuliaji chipukizi wa Manchester United, JJ Gabriel. Kijana huyo mwenye umri wa miaka 15 amekuwa gumzo baada ya kuripotiwa kuwa anataka kuondoka ndani ya klabu hiyo ya Old Trafford.

Carragher anaamini kuwa tatizo kubwa hapa ni kasi ya maendeleo ya kijana huyo. Inaonekana Gabriel anahisi hapati nafasi ya kukua kama alivyotarajiwa kulingana na ahadi alizopewa na klabu wakati anajiunga nao.

Ahadi zisizotimia?

Kwenye kipindi cha The Overlap, Carragher alieleza kuwa huenda klabu ilimpa matumaini makubwa kijana huyo ambayo sasa yameshindwa kufikiwa. Mchambuzi huyo anaona kuwa kutajwa kwa taarifa za kutaka kuondoka siku moja kabla ya mchezo wa Carabao Cup dhidi ya Brighton ni ishara tosha kuwa kuna kitu kimeenda mrama.

Carragher anahisi huenda kocha Michael Carrick alimwambia mchezaji huyo kuwa hatakuwepo kwenye kikosi kitakachocheza dhidi ya Brighton, jambo lililomvunja moyo kijana huyo.

“Ilikuwa ni nafasi ya kumuonyesha kijana huyo. Ninaweza kuhisi alipewa ahadi kuwa atacheza mechi yake ya kwanza kabla hajafikisha miaka 18. Pengine alitaka kuwa mchezaji mdogo zaidi kuwahi kuichezea Manchester United. Hizo ndizo aina ya presha ambazo wawakilishi wao wanazileta kwenye klabu,” alisema Carragher.

Changamoto za soka la kisasa kwa vijana

Carragher aliongeza kuwa soka la sasa limebadilika sana ukilinganisha na kipindi yeye anaanza soka. Zamani, wachezaji walikuwa chini ya mamlaka ya klabu, lakini sasa mambo ni tofauti ambapo mawakala na wazazi wanakuwa na sauti kubwa.

Anaamini kuwa vijana wa sasa wanataka kupanda ngazi kwa kasi sana. Kama alivyoeleza:

“Kuna mambo mawili makubwa; aidha ni suala la pesa au kasi ya maendeleo. Zamani, nilikuwa nacheza kwenye timu ya umri mkubwa zaidi ya ule wangu, na hilo lilikuwa jambo kubwa. Sasa hivi, hawa watoto wanataka kuruka madaraja manne kwa mpigo. Wanataka wafanye mazoezi na timu kubwa, na kama haitoshi wanataka kucheza kila wiki. Wanajaribu kuipangia klabu na makocha nini cha kufanya.”

Suala hili linaendelea kuwa gumzo huku mashabiki wengi wakisubiri kuona hatma ya kinda huyo na kama Manchester United watafanikiwa kumshawishi kusalia na kutuliza presha za maendeleo yake.