Jamie Carragher: Viktor Gyokeres kamwe hatamtoa Kai Havertz Arsenal

Havertz ni muhimu kwa mfumo wa Arteta

Mchambuzi wa soka na gwiji wa zamani wa Liverpool, Jamie Carragher, ametoa mtazamo mzito kuhusu ushindani uliopo katika safu ya ushambuliaji ya Arsenal kati ya Kai Havertz na usajili mpya, Viktor Gyokeres.

Licha ya Arsenal kumsajili Gyokeres kwa ada ya takriban pauni milioni 64 ili kuongeza nguvu na ushindani baada ya kuondoka kwa Gabriel Jesus kuelekea Barcelona, Carragher anaamini kuwa nafasi ya Havertz kikosini ni ngumu sana kutikiswa.

Kwa nini Havertz haondoki kikosini?

Akizungumza baada ya Arsenal kushinda 2-1 dhidi ya Chelsea mchezo uliomwona Havertz akifunga bao, Carragher alisisitiza kuwa mchezaji anayeweza kumtoa Mjerumani huyo lazima awe na kiwango cha juu sana cha uchezaji, akifananisha na magwiji kama Thierry Henry au Ian Wright.

“Ili kumtoa Kai Havertz kwenye timu hii, unazungumzia mmoja wa wachezaji bora duniani. Gyokeres kamwe hatachukua nafasi ya Havertz, siyo sasa wala wakati wowote ujao,” alisema Carragher.

Carragher aliongeza kuwa ubora wa Havertz haupimwi kwa magoli pekee, bali kwa namna anavyosaidia timu nzima katika kuzuia na kushambulia (facilitator). Alisema Havertz anafanya kazi kubwa ya kukaba kuanzia mbele, jambo ambalo ni ngumu kwa washambuliaji wengi wanaolenga magoli pekee kukubali kulifanya.

Ulinzi wa Arsenal kuanzia mbele

Uchambuzi wa Carragher unasisitiza kuwa nguvu ya ulinzi ya Arsenal, ambayo imekuwa ikizuia wapinzani kupata mashuti mengi golini, inategemea nidhamu ya wachezaji wa mbele, ikiwemo Havertz ambaye anarudi kusaidia timu hadi mita 25 au 30 kutoka langoni mwao.

“Unapomuomba mshambuliaji wa daraja la dunia, mtu ambaye anawaza magoli tu, arudi kufanya kazi hiyo ya kukaba, hatofanya. Havertz anafanya vitu vingi zaidi ya kufunga, ndiyo maana ni vigumu sana kumtoa kwenye kikosi cha Mikel Arteta,” aliongeza Carragher.

Kimsingi, Carragher anaona kuwa Arteta angetakiwa kupunguza ubora wa ulinzi wa timu yake endapo ataamua kumtoa Havertz ili kuweka mshambuliaji mwingine mwenye hulka tofauti, jambo ambalo linaonekana kutokuwa na faida kwa mfumo wa sasa wa Arsenal.