Javier Aguirre: Tutamfanya Harry Kane akose raha uwanjani dhidi ya England

Mkakati wa Mexico dhidi ya Harry Kane

Kocha mkuu wa timu ya taifa ya Mexico, Javier Aguirre, ametoa onyo kali kuelekea mchezo wa hatua ya 16 bora ya Kombe la Dunia dhidi ya England. Aguirre ameweka wazi kuwa lengo lake kubwa ni kuhakikisha nahodha wa England, Harry Kane, hapati nafasi ya kucheza kwa uhuru uwanjani.

Mexico, ambao ni wenyeji wenza wa michuano hii, wamekuwa na mwendelezo mzuri sana tangu kuanza kwa mashindano hayo. Wameshinda michezo yote minne waliyocheza na cha kuvutia zaidi ni kwamba hawajaruhusu bao lolote mpaka sasa. Sasa wanakutana na England ya Thomas Tuchel, timu inayotajwa kuwa jaribio gumu zaidi kwa Mexico mpaka sasa.

Heshima kwa nahodha wa England

Akizungumzia ubora wa Kane, ambaye tayari amefunga mabao matano katika michuano hii, Aguirre hakuificha heshima yake kwa mshambuliaji huyo wa Bayern Munich.

“Harry Kane ni gwiji wa soka la dunia. Mabao aliyofunga Tottenham, Bayern, na timu ya taifa, ni ya mchezaji wa kiwango cha juu. Ana kimo cha mita 1.88, lakini pamoja na umbo lake, ana uwezo mkubwa wa kutumia miguu yake, anajua kucheza mipira ya hewani, na anajua kila kitu.”

Mipango ya kuwadhibiti Waingereza

Ili kuondokana na hatari ya Kane, Aguirre amepanga kutumia mfumo wa kumfuatilia kwa ukaribu mshambuliaji huyo muda wote anapokuwa na mpira au anaposhuka chini kutafuta nafasi. Amesema kuwa hatawachia mabeki wake wa kati pekee jukumu hilo.

“Tutajaribu kumtuliza kwa kumtumia beki wa kati, kiungo anayekuja kusaidia, pamoja na msaada kutoka kwa mabeki wa pembeni. Tutahakikisha hapati raha uwanjani anaposhuka chini, kila mara kutakuwa na mtu wa kumfuatilia ili ashindwe kutengeneza nafasi za hatari,” aliongeza kocha huyo.

Mexico na heshima kwa England

Licha ya beki wa England, Marc Guehi, kuwataja Mexico kama vipenzi (favorites) vya mchezo huo, Aguirre amepinga hilo na kusisitiza kuwa England ni timu kubwa yenye uwezo mkubwa. Amebainisha kuwa ili Mexico ipate ushindi, watalazimika kucheza mchezo ambao ni ‘karibu na ukamilifu’.

Aguirre pia amezungumzia mabadiliko ya staili ya soka ya England tangu walipoanza kufundishwa na Thomas Tuchel, akisema England imekuwa timu yenye kasi, nguvu ya kimwili, na uwezo wa kubadilisha mbinu kulingana na mpinzani.

Kuhusu suala la hali ya hewa na mwinuko wa uwanja wa Azteca, Aguirre amesema hawataki kutumia mambo hayo kama kisingizio. Kwake yeye, mchezo utakuwa ni 11 dhidi ya 11, na jukumu lao ni kuhakikisha wanapambana ndani ya uwanja ili kupata matokeo mazuri.