Jeremie Aliadiere ampendekeza Arsenal kumsajili staa wa PSG

Aliadiere aitaja chaguo bora kwa Arsenal

Aliyekuwa mshambuliaji wa Arsenal, Jeremie Aliadiere, ametoa maoni yake kuhusu mchezaji ambaye anapaswa kusajiliwa na ‘The Gunners’ ili kuongeza makali kwenye safu yao ya ushambuliaji. Badala ya kumtazama Kylian Mbappe ambaye mara nyingi hutajwa kuwa mchezaji bora duniani, Aliadiere anaamini kuwa winga wa Paris Saint-Germain (PSG), Kvicha Kvaratskhelia, angekuwa chaguo bora zaidi kwa Arsenal.

Katika mahojiano yake, Aliadiere alieleza hofu yake kuhusu jinsi Mbappe angeweza kuingia kwenye mfumo wa Arsenal. Alisisitiza umuhimu wa ushirikiano ndani ya timu na nidhamu ya vyumba vya kubadilishia nguo.

“Mara moja ningesema Kylian Mbappe kwa sababu nadhani ndiye mchezaji bora duniani. Lakini je, angeweza kuingia kwenye kikosi hicho na timu hiyo? Je, angechezea timu au angecheza kwa maslahi binafsi? Sina uhakika, kwa hiyo sijui kama ingekuwa vizuri,” alisema Aliadiere.

Kwa nini Kvaratskhelia?

Aliadiere anaamini kuwa Kvaratskhelia ni chaguo sahihi zaidi kwa sababu ya uwezo wake wa kufanya kazi kwa bidii na kusaidia timu. Mchezaji huyu anacheza pembeni upande wa kushoto, eneo ambalo Aliadiere anaona ni muhimu kwa Arsenal kuimarisha.

“Ningemchagua Kvaratskhelia anayekipiga PSG kwa sababu nadhani yeye ni mchezaji anayefanya kazi na timu na anajituma sana. Na kama nilivyosema, anacheza upande wa kushoto, eneo ambalo tungeweza kuliimarisha msimu huu. Nadhani hilo lingekuwa jambo zuri sana,” aliongeza.

Mtazamo kuhusu Viktor Gyokeres

Katika hatua nyingine, Aliadiere alizungumzia hali ya Viktor Gyokeres na changamoto anazokutana nazo kulingana na mfumo wa uchezaji wa Mikel Arteta. Aliadiere alibainisha kuwa ingawa Gyokeres ni mfungaji mahiri, mfumo wa Arsenal wa kumiliki mpira na kucheza pasi fupi huenda haumsaidii mshambuliaji huyo ambaye anapendelea mipira ya kasi.

Alimtetea Kai Havertz, akisema kuwa kocha Mikel Arteta anaendelea kumwamini kwa sababu anafiti vyema kwenye mfumo wa sasa wa timu. “Sisi si timu ambayo katika hali ya kushambulia kwa kushtukiza, tunapiga mpira mrefu moja kwa moja kwa mshambuliaji ili akimbie. Sio vile tunavyocheza. Tunapenda kumiliki mpira na kwenda pembeni kwa mawinga wetu,” alihitimisha Aliadiere.

Arsenal, ambayo msimu huu ilifanya mabadiliko kadhaa kwenye safu yake ya ushambuliaji baada ya kuondoka kwa wachezaji kama Gabriel Jesus, Leandro Trossard na Gabriel Martinelli, inaendelea kutafuta njia sahihi ya kuwa na kikosi tishio zaidi katika mbio za ubingwa wa Ligi Kuu ya Uingereza.