JJ Gabriel aamua kuondoka Manchester United, Barcelona anaipenda zaidi

Uamuzi mgumu wa JJ Gabriel

Kipaji kinda kinachozungumziwa sana barani Ulaya, JJ Gabriel, kimefanya uamuzi mgumu wa kuondoka Manchester United. Kijana huyu mwenye umri wa miaka 15 ameweka wazi kuwa hana nia ya kubaki Old Trafford, uamuzi ambao unatarajiwa kuleta mtikisiko katika dirisha lijalo la usajili.

Taarifa kutoka Hispania zinathibitisha kuwa Gabriel na wawakilishi wake wamefikia uamuzi wa mwisho wa kuachana na klabu hiyo ya Premier League. Inasemekana kuwa mchezaji huyo amekataa katakata kusaini mkataba mpya, na Manchester United imeshakubali kuwa hakuna nafasi ya kumbadilisha mawazo.

Kwa nini anataka kuondoka?

Sababu kubwa inayotajwa ni kutoridhishwa na hali ya sasa ya Manchester United, ambayo inaonekana kutokuwa na mwelekeo wa mafanikio kama kijana huyo anavyotarajia. Aidha, Gabriel anahisi kuwa hapati nafasi ya kutosha ya kukua na kuonyesha kipaji chake ndani ya kikosi hicho, jambo linalomfanya atafute changamoto mpya nje ya England.

Hispania ndiyo mwisho wa safari?

Ingawa kulikuwa na tetesi kuwa kijana huyo amesafiri kwenda Barcelona kwa ajili ya mazungumzo ya moja kwa moja, mtaalamu wa usajili Fabrizio Romano amekanusha hilo. Romano ameweka wazi kuwa mazungumzo bado yanafanyika kupitia wawakilishi wa mchezaji, na siyo kwamba Gabriel amesafiri ili kukamilisha dili hilo sasa hivi.

“Mazungumzo yanaendelea, wawakilishi na familia yake wanazungumza na klabu mbalimbali. Real Madrid, Barcelona na vilabu vingine vipo kwenye mbio. Hispania ndiyo sehemu inayopendwa zaidi, lakini bado hatujafika hatua ya mchezaji kusafiri ili kufunga mkataba,” alisema Romano.

Barcelona anaipenda zaidi

Licha ya vilabu vigogo kama Real Madrid, PSG, na Bayern Munich kuonyesha nia ya kumsajili, ripoti kutoka gazeti la Sport zinaonyesha kuwa Gabriel ana mapenzi maalum na Barcelona. Inaelezwa kuwa kijana huyo amekuwa akionyesha hadharani kuvutiwa na klabu hiyo ya Catalan kupitia mitandao ya kijamii.

Bado haijajulikana ni wapi hasa kijana huyu atatua, lakini ni wazi kuwa anaelekea kwenye ligi ya La Liga. Klabu zote kubwa zinazomwinda zimeshafahamishwa kuhusu hamu yake ya kutaka kucheza soka nchini Hispania.