Joe Cole amshauri Yan Diomande kuikataa PSG na kutua Liverpool

Shinikizo kwa Diomande

Wakati dirisha la usajili likiendelea kunoga, nyota wa RB Leipzig na timu ya taifa ya Ivory Coast, Yan Diomande, amepata ushauri mzito kutoka kwa gwiji wa zamani wa Liverpool, Joe Cole. Diomande, ambaye anatajwa kuwa mmoja wa mawinga hatari zaidi duniani kwa sasa, anahusishwa kwa karibu na mpango wa kutaka kujiunga na mabingwa wa Ufaransa, PSG.

Hata hivyo, Joe Cole anaamini kuwa Liverpool ndiyo sehemu sahihi zaidi kwa kijana huyo kukuza kipaji chake kuliko kwenda jijini Paris.

“Ushauri wangu kwake kama mchezaji kijana ni huu: Usijisumbue kwenda PSG. Nenda Liverpool kwa sababu kama wanakuhitaji na wana nafasi wazi ya wewe kucheza, basi wanahitaji huduma yako kwa dhati,” alisema Cole kupitia Liverpool Echo.

Liverpool bado inatafuta mrithi wa Salah

Liverpool kwa sasa inafanya jitihada kubwa za kusuka upya safu yake ya ushambuliaji baada ya kuondoka kwa Mohamed Salah. Klabu hiyo tayari imekamilisha usajili wa Victor Munoz na Jeremy Jacquet, lakini bado kocha Iraola anahitaji winga mwingine mwenye kasi ili kukamilisha kikosi chake.

Diomande alikuwa chaguo la kwanza, lakini ofa ya Liverpool ya pauni milioni 86 haikufika thamani ya euro milioni 130 (pauni milioni 111) inayohitajika na RB Leipzig, jambo linaloifanya PSG kuonekana kuwa na nafasi kubwa zaidi ya kumnasa mchezaji huyo.

Mtazamo wa ndani ya Anfield

Kwa upande mwingine, mwandishi nguli wa masuala ya Liverpool, James Pearce, ameweka wazi kuwa uongozi wa klabu hiyo ulikuwa na utaratibu maalum wa kusubiri kumalizika kwa Kombe la Dunia kabla ya kufanya usajili mkubwa. Hii ni kutokana na hitaji la kocha Iraola kutathmini vyema vipaji alivyovikuta kikosini.

Pearce ametoa majina manne ambayo Liverpool inayaangalia kama mbadala wa Diomande iwapo dili la Mivory Coast huyo litashindikana:

• Bradley Barcola (PSG)
• Yankuba Minteh (Brighton & Hove Albion)
• Said El Mala (FC Koln)
• Matias Fernandez-Pardo (Lille)

Wakati mazoezi ya kabla ya msimu yakitarajiwa kuanza Julai 14 katika uwanja wa Kirkby, mashabiki wa Liverpool wanasubiri kuona ni nani atakayekuwa mrithi wa moja kwa moja wa Salah katika nafasi ya winga.