Jose Mourinho amzuia Aurelien Tchouameni kujiunga na Manchester United

Matumaini ya Manchester United kumnasa kiungo fundi wa Real Madrid, Aurelien Tchouameni, yamepata pigo kubwa baada ya mchezaji huyo kukubali kusaini mkataba mpya wa kuendelea kusalia Santiago Bernabeu hadi mwaka 2031.

Ushawishi wa Mourinho

Ripoti mbalimbali zimebainisha kuwa kocha mpya wa Real Madrid, Jose Mourinho, ndiye aliyekuwa kikwazo kikubwa kwa Manchester United. Licha ya United kuhusishwa kwa karibu na kiungo huyo wa kimataifa wa Ufaransa, Mourinho alitumia ushawishi wake kuhakikisha staa huyo hapotei.

Inaelezwa kuwa Mourinho alifanya mazungumzo ya moja kwa moja na Tchouameni ili kumweleza umuhimu wake katika mipango yake ya baadaye klabuni hapo.

Jose Mourinho alikuwa akisisitiza nyuma ya pazia ili kumbakiza Tchouameni. Anahitaji aina hiyo ya wachezaji; wapiganaji wenye utayari wa kiakili na nguvu za kimwili. Hakutaka hata kidogo kumuona Tchouameni akiondoka, alieleza mtaalamu wa usajili Fabrizio Romano.

United ilijaribu nguvu zao

Manchester United ilikuwa imeonyesha nia ya dhati ya kumleta mchezaji huyo Old Trafford ili kuimarisha kikosi cha Michael Carrick. Kulikuwa na taarifa za United kutoa ofa ya mkataba wa miaka mitano na kuonekana tayari kutoa kiasi kikubwa cha pesa ili kukamilisha dili hilo wakati huu ambapo mchezaji huyo yuko kwenye michuano ya Kombe la Dunia.

Hata hivyo, Real Madrid haikuwa tayari kumwachia kiungo huyo. Kwa mujibu wa vyanzo vya kuaminika, mazungumzo kati ya Mourinho na Tchouameni yaliwahakikishia viongozi wa Madrid kuwa mchezaji huyo bado ana hamu ya kupigania mafanikio akiwa na jezi ya Los Blancos.

Mkataba mnono

Katika makubaliano hayo mapya, Tchouameni anatarajiwa kupata mshahara wa takriban Euro milioni 13 kwa mwaka, jambo linalomfanya kuwa mmoja wa wachezaji wanaolipwa vizuri zaidi klabuni hapo. Hii ni ishara tosha kuwa Mourinho anajenga timu yake kwa kutegemea nguzo muhimu kama kiungo huyo.

Uamuzi huu unaiacha Manchester United ikilazimika kugeukia malengo mengine katika dirisha hili la usajili, huku Real Madrid ikionyesha wazi kuwa chini ya Mourinho, hawako tayari kupoteza vipaji vyao muhimu kwa timu nyingine.