Joshua Zirkzee afungua mlango kutua Juventus, Man Utd watafuta mbadala

Zirkzee yuko tayari kurudi Serie A

Mambo yameanza kubadilika katika kambi ya Manchester United. Mshambuliaji Joshua Zirkzee anatajwa kuwa hatua moja karibu na kuondoka Old Trafford baada ya kuripotiwa kukubali ofa ya kujiunga na miamba ya Italia, Juventus.

Tangu ajiunge na United akitokea Bologna, Zirkzee amekuwa na wakati mgumu kuonyesha makali yake. Katika mechi 56 alizocheza Ligi Kuu ya Uingereza, mshambuliaji huyo wa Kiholanzi amefanikiwa kufunga mabao matano pekee. Hali hiyo, ikijumuisha kuongezeka kwa ushindani kikosini baada ya kusajiliwa kwa kina Benjamin Sesko, Matheus Cunha, na Bryan Mbeumo, kumemfanya apoteze nafasi yake ya kudumu kikosini.

Uamuzi wa kurudi Italia

Kwa mujibu wa ripoti kutoka nchini Italia, hasa gazeti la Gazzetta dello Sport, Zirkzee anaonekana kuvutiwa sana na wazo la kurejea Serie A kupitia Juventus. Mchezaji huyo mwenye umri wa miaka 25 anaamini kuwa mazingira ya soka la Italia ndiyo yatakayomsaidia kurudisha kiwango chake baada ya misimu miwili yenye changamoto nyingi Manchester.

Hata hivyo, dili hili bado halijakamilika kwa haraka. Inafahamika kuwa Juventus wanasubiri kwanza kupata ufumbuzi wa hatma ya mshambuliaji wao, Jonathan David, kabla hawajafanya uamuzi wa mwisho juu ya Zirkzee.

Mpango wa mkopo mezani

Inaripotiwa kuwa Manchester United na Juventus wako kwenye mazungumzo ya kupata muafaka wa uhamisho huu. Kuna dalili kubwa kuwa dili hilo linaweza kuwa la mkopo wenye kipengele cha kumnunua moja kwa moja (option to buy), mfumo ambao unafanana na ule uliotumiwa walipomtoa Marcus Rashford kwenda FC Barcelona msimu uliopita.

United wanamnyatia Igor Thiago

Wakati Zirkzee akikaribia kuondoka, uongozi wa INEOS huko Manchester United haujakaa kimya. Wanatafuta mbadala wa haraka ili kuimarisha safu ya ushambuliaji chini ya kocha Michael Carrick.

Habari za ndani zinasema kuwa United wameanza kuulizia uwezekano wa kumsajili mshambuliaji hatari wa Brentford, Igor Thiago. Mwandishi wa habari za michezo, Ben Jacobs, amethibitisha kuwa tayari klabu imefanya mawasiliano ya awali ili kufahamu hali ya mchezaji huyo.

“Igor Thiago amejadiliwa kama mchezaji ambaye yuko tayari kwa changamoto ya Ligi Kuu ya Uingereza. Hakuna zaidi ya hapo kwa sasa, ni mazungumzo ya ndani tu ya kawaida ili kuelewa hali yake,” alisema Jacobs.

Ingawa dili la Thiago linaonekana kuwa gumu kukamilika katika dirisha hili la usajili kutokana na msimamo wa klabu yake, nia ya United inaonyesha wazi kuwa wanataka kuboresha kikosi chao kwa ajili ya msimu ujao wa Ligi ya Mabingwa Ulaya.