Julian Alvarez sasa aona Arsenal ndiyo njia pekee ya kutokea Atletico Madrid

Hali ngumu kwa Alvarez huko Madrid

Staa wa kimataifa wa Argentina, Julian Alvarez, inaonekana sasa amekubali uhalisia kuwa ndoto yake ya kutua Barcelona haitawezekana. Kwa mujibu wa ripoti kutoka nchini Hispania, mshambuliaji huyo mwenye umri wa miaka 26 amefikia hatua ya kuitazama Arsenal kama chaguo lake pekee la kuondoka Atletico Madrid katika dirisha hili la usajili.

Tangu mwezi Juni, Alvarez alionyesha wazi nia yake ya kutaka kuondoka Atletico, huku Barcelona wakiwa ndio walengwa wakuu. Hata hivyo, uongozi wa Atletico umekuwa mgumu na kutoa msimamo mkali kuwa hawako tayari kumuuza nyota huyo kwa mpinzani wao wa ligi hiyo ya La Liga.

Uhasama kati ya Atletico na Barcelona

Uongozi wa Atletico Madrid umeweka wazi kuwa hakuna uwezekano wowote wa Alvarez kujiunga na Barcelona. Katika taarifa iliyotolewa na klabu hiyo, walisisitiza kuwa suala hili halihusu pesa, bali ni suala la heshima na hadhi ya klabu.

“Hakuna asilimia sifuri ya nafasi ya kumuuza kwenda Barca. Kumekuwa na kampeni ya uongo na nusu ukweli. Mtu pekee anayeumia kwa hili ni Atletico,” ilieleza sehemu ya taarifa hiyo.

Mtendaji mkuu wa klabu hiyo, Miguel Angel Gil Marin, naye amesisitiza kuwa Atletico ndiyo sehemu sahihi kwa mchezaji huyo, akiongeza kuwa bado ana mkataba wa miaka minne na klabu hiyo.

Presha ya mashabiki na matatizo ya mazoezi

Siku za hivi karibuni zimekuwa ngumu kwa Alvarez. Katika mchezo wa kwanza wa ligi dhidi ya Villarreal uliomalizika kwa sare ya 2-2, Alvarez alipokea zomea zomea kali kutoka kwa mashabiki wa Atletico alipoingia uwanjani kama mchezaji wa akiba. Hali hiyo inaripotiwa kuwa imeathiri kisaikolojia mchezaji huyo.

Ripoti kutoka gazeti la Marca zinaeleza kuwa Alvarez hakuhudhuria mazoezi siku ya Jumatano baada ya kuwasiliana na klabu kuwa hajisikii vizuri. Inadaiwa kuwa Atletico wanataka mchezaji huyo aombe radhi na pia atafute wakala mwingine, baada ya wakala wake wa sasa, Fernando Hidalgo, kuingia kwenye mgogoro na uongozi wa klabu hiyo kupitia mitandao ya kijamii.

Fursa kwa Arsenal

Kwa sasa, inaonekana Alvarez amegundua kuwa njia pekee ya kuondoka Metropolitano ni kuelekea London, kwenye klabu ya Arsenal. Mkurugenzi wa michezo wa klabu hiyo, Andrea Berta, anatarajiwa kuwa na wiki yenye shughuli nyingi kuelekea kufungwa kwa dirisha la usajili ili kuona kama wanaweza kukamilisha dili hilo la kihistoria.

Wakati hali ikiwa tete, mashabiki wa Arsenal wanasubiri kuona kama kweli nyota huyo ataweza kutua Emirates Stadium katika saa chache zilizosalia za dirisha la usajili.