Mvutano wa Julian Alvarez: CEO wa Atletico Madrid awajia juu mawakala wa staa huyo

Mambo yameonekana kuwa moto ndani ya klabu ya Atletico Madrid kufuatia kauli nzito iliyotolewa na Mkurugenzi Mtendaji wa klabu hiyo, Miguel Angel Gil Marin, kuhusiana na mustakabali wa mshambuliaji wao, Julian Alvarez.

Katika kipindi chote cha dirisha hili la usajili, Alvarez amekuwa akihusishwa na tetesi nyingi za kuondoka, huku akionyesha wazi nia yake ya kutaka kujiunga na Barcelona. Hata hivyo, uongozi wa Atletico umekuwa mgumu na kusisitiza kuwa hawatamruhusu mchezaji huyo kujiunga na wapinzani wao hao wa La Liga.

Kauli nzito ya Gil Marin

Akizungumzia hali hiyo, Gil Marin hakuuma maneno na kuamua kuwashutumu watu wanaomshauri Alvarez, akiamini kuwa mienendo yao imekuwa ikichochea mpasuko badala ya kujenga.

“Ni lazima tuelewe kwamba Julián hajapata washauri bora zaidi wanaomzunguka kuhusu taaluma yake katika miezi ya hivi karibuni,” alisema Gil Marin.

CEO huyo aliongeza kuwa klabu haitakubali kuruhusu vilabu vingine au vyombo vya habari viamue mkakati wao wa usajili au kuwatukana. Alisisitiza kuwa Atletico inajengwa na thamani zake, na wanahitaji umoja ili kuendelea kushindana na klabu kubwa za Ulaya.

Arsenal walijaribu bahati yao

Wakati mvutano huo ukiendelea, mtaalamu wa masuala ya usajili, Fabrizio Romano, ameweka wazi kuwa klabu ya Arsenal ya Uingereza ilijaribu kuingilia kati ili kumsajili mshambuliaji huyo wa Argentina.

Inaelezwa kuwa wawakilishi wa Arsenal walikutana na Mkurugenzi wa Atletico Madrid, Mateu Alemany, jijini London ili kufahamu mazingira ya dili hilo. Hata hivyo, jitihada za Arsenal hazikufua dafu kutokana na sababu kuu mbili:

Bei ya mchezaji huyo ilitajwa kuwa kubwa mno.
Julian Alvarez mwenyewe hakuwa tayari kutua nchini Uingereza, kwani kipaumbele chake kikubwa kilikuwa ni kujiunga na Barcelona.

Hatima ya mchezaji

Licha ya presha zote zilizojitokeza, inaonekana kuwa Julian Alvarez ataendelea kuwa mchezaji wa Atletico Madrid msimu huu. Gil Marin alihitimisha kwa kusema kuwa klabu itampa mchezaji huyo kila aina ya ushirikiano ili aweze kuonyesha uwezo wake mkubwa uwanjani, kwani bado wanamhitaji katika mipango yao ya ushindani.