Jurgen Klopp aanza kazi Ujerumani kwa kutoa onyo zito

Mwanzo mpya kwa Klopp Ujerumani

Jurgen Klopp hatimaye amekabidhiwa mikoba ya kuinoa timu ya taifa ya Ujerumani, hatua ambayo ilitarajiwa na wengi tangu kujiuzulu kwa Julian Nagelsmann baada ya michuano ya Kombe la Dunia. Hata hivyo, kocha huyo mahiri ameanza kazi yake kwa mtindo wa aina yake, akitoa onyo zito kwa wadau na mashabiki wa soka nchini humo kuhusu mazingira ya kazi yake.

Katika mkutano wake wa kwanza na waandishi wa habari, Klopp hakuwa na muda wa kupoteza, akisisitiza kuwa hatovumilia uvunjifu wa heshima kwake au kwa familia yake. Kocha huyo anayejulikana kwa msimamo wake alisema wazi kuwa yuko tayari kuondoka wakati wowote iwapo hatopata utulivu anaouhitaji.

“Kama mtafanya vibaya na kutoiacha familia yangu kwa amani, basi nitaondoka, nitageuka na kuondoka zangu,” alisema Klopp.

Heshima kwa makocha waliotangulia

Klopp alionyesha wazi kutoridhishwa na jinsi watangulizi wake, Julian Nagelsmann na Thomas Tuchel, walivyoshughulikiwa wakati wa vipindi vyao. Licha ya changamoto hizo, alisema amekubali kazi hiyo kwa ajili ya taifa na si kwa maslahi yake binafsi.

“Sifanyi kazi hii kwa ajili yangu, naifanya kwa ajili yenu. Nimekubali nafasi hii licha ya kuona jinsi mlivyowatendea Julian Nagelsmann na Thomas Tuchel,” aliongeza kocha huyo.

Safari ya mwisho katika ukocha

Katika hali inayoashiria kuwa sasa amefika kilele cha taaluma yake, Klopp amedokeza kuwa kibarua chake ndani ya timu ya taifa ya Ujerumani kinaweza kuwa cha mwisho kwake katika ulimwengu wa ukocha. Kwa mujibu wa mkataba wake, atakuwa na timu hiyo hadi mwaka 2030, ambapo fainali za Kombe la Dunia zitafanyika nchini Hispania, Ureno, na Morocco.

“Jurgen Klopp hatakuwa na ‘kazi’ yoyote baada ya timu ya taifa. Hapa ndipo kilele cha taaluma yangu ya soka kama kocha. Nitatoa kila kitu nilichonacho,” alisema Klopp kwa msisitizo.

Imani ya Klopp kurejesha heshima ya Ujerumani

Licha ya Ujerumani kuwa na changamoto katika viwango vya FIFA na kushindwa kuendana na mataifa makubwa kama Ufaransa, Hispania na Argentina kwa sasa, Klopp anaamini kuwa mafanikio yanawezekana ikiwa watajikita zaidi katika falsafa yao ya mchezo badala ya kulinganisha vikosi.

“Hatupo namba moja duniani kwa sasa, lakini lazima tufanye iwezekane kuwafunga kwa jinsi tunavyocheza soka. Sio muhimu kuangalia Ufaransa, Hispania au Argentina. Lazima tuangalie sisi wenyewe,” alihitimisha Klopp.