Soka la dunia linaomboleza: Kevin Keegan afariki dunia akiwa na umri wa miaka 75

Ulimwengu wa soka umegubikwa na huzuni nzito kufuatia kifo cha gwiji wa soka la Uingereza, Kevin Keegan, aliyefariki dunia akiwa na umri wa miaka 75.

Familia ya mkongwe huyo imethibitisha kuwa Keegan amefariki baada ya kupambana na ugonjwa wa saratani, uliogundulika mwezi Januari mwaka huu. Kulingana na taarifa rasmi, Keegan alikuwa akipatiwa matibabu makali kabla ya kuaga dunia akiwa amezungukwa na mke wake pamoja na binti zake.

Safari ya heshima uwanjani

Keegan atakumbukwa kama mmoja wa wachezaji bora kabisa kuwahi kutokea nchini Uingereza. Katika kipindi chake cha uchezaji, alizichezea klabu kubwa zikiwemo Liverpool, Newcastle United, Hamburg na Southampton, huku akiwa mmoja wa nguzo muhimu kwenye kikosi cha timu ya taifa ya Uingereza kwa kucheza michezo 63.

Uwezo wake wa kusakata soka, kupiga chenga, na kufunga mabao ulimfanya kuwa mshambuliaji tishio. Mafanikio yake makubwa zaidi yalimfanya kushinda tuzo ya Ballon d’Or mara mbili mfululizo, jambo ambalo ni heshima kubwa katika soka la dunia. Akiwa Liverpool, alishinda mataji mengi yakiwemo ya Ligi Kuu, Kombe la Ulaya, na UEFA Cup.

Alama aliyoiacha kama kocha

Baada ya kustaafu uchezaji, Keegan aligeukia kazi ya ukocha ambapo aliendelea kuacha alama. Aliiongoza Newcastle United kwa mafanikio makubwa, na pia alipata kuzifundisha Fulham, Manchester City, na timu ya taifa ya Uingereza.

Newcastle United, klabu ambayo Keegan alikuwa na uhusiano nayo wa kipekee, imeelezea masikitiko yao makubwa kwa kumpoteza mtu waliyemwita “moyo wa klabu hiyo.”

“Kevin alikuwa zaidi ya mchezaji na kocha nguli. Yeye alikuwa moyo wa Newcastle United kwa vizazi vingi vya mashabiki wetu,” ilisomeka sehemu ya taarifa ya klabu hiyo.

Heshima kutoka kila pembe

Taarifa za kifo chake zimeibua simanzi kubwa kwa wachezaji wenzake na wale aliowafundisha. Nguli wa Newcastle, Alan Shearer, hakuweza kuficha hisia zake kwa kusema:

“Shujaa wangu. Kocha wangu. Rafiki yangu. Pumzika kwa amani, Bosi.”

Liverpool pia wameungana na ulimwengu wa soka kumuomboleza mchezaji wao huyo wa zamani, wakisema kuwa mchango wake utaendelea kukumbukwa milele katika historia ya Anfield.

Shirikisho la Soka la Uingereza (FA) limetangaza kuwa kutakuwa na shughuli maalum ya kuadhimisha maisha ya Keegan wakati wa mchezo wa timu ya taifa dhidi ya Hispania utakaopigwa Septemba 26, katika dimba la Wembley.