Kylian Mbappe: Nilikaribia kujiunga na Liverpool kwa shinikizo la mama yangu

Safari iliyokaribia kutokea Anfield

Staa wa Real Madrid na nahodha wa timu ya taifa ya Ufaransa, Kylian Mbappe ameweka wazi jambo ambalo wengi hawakulijua hapo awali. Katika mahojiano yake na The Athletic, mshambuliaji huyo aliyepata umaarufu akiwa kijana mdogo katika klabu ya Monaco, amesema kuwa alikaribia sana kujiunga na Liverpool kabla ya kuchagua kurejea nyumbani kujiunga na Paris Saint-Germain (PSG) mwaka 2017.

Wakati huo, dunia nzima ilikuwa ikimfuatilia kijana huyo aliyekuwa akionyesha kiwango cha kipekee uwanjani. Hata hivyo, kulikuwa na ushawishi mkubwa nyumbani kwa Mbappe, hasa kutoka kwa mama yake ambaye alikuwa na ndoto ya kumuona mwanawe akicheza soka la ushindani nchini Uingereza, hususan ndani ya dimba la Anfield.

Ushawishi wa mama yake

Mbappe alieleza kuwa mama yake alikuwa shabiki mkubwa wa aliyekuwa kocha wa Liverpool, Jurgen Klopp, na aliamini kuwa Anfield ndiyo sehemu sahihi kwa maendeleo ya mchezaji huyo.

“Ilikuwa wakati nikiwa Monaco. Ilinibidi nichukue uamuzi, na ndio, nilikuwa karibu sana na Liverpool. Mama yangu alikuwa shabiki mkubwa wa Jurgen Klopp na alitamani sana nijiunge na Liverpool. Alitaka niende huko,” alisema Mbappe.

Kulingana na Mbappe, mama yake alijaribu mara kadhaa kumshawishi kwa kueleza jinsi klabu hiyo ilivyo na umoja na utamaduni wa kifamilia. Hata aliwahi kutembelea Anfield peke yake ili kuhisi mazingira na kufikiria jinsi mwanawe angekuwa akicheza mbele ya mashabiki wa klabu hiyo.

Kwa nini alikataa?

Licha ya shinikizo hilo la kifamilia na heshima kubwa aliyokuwa nayo kwa Jurgen Klopp, Mbappe aliamua kufuata moyo wake. Alihisi kuwa wakati wake wa kuondoka nchini Ufaransa ulikuwa bado haujafika na alitaka kujenga jina lake kwanza katika jiji alilozaliwa.

“Sikusikiliza kwa sababu nilitaka kucheza katika jiji langu, Paris. Sikutaka kuondoka nchini mwangu kabla sijawa mtu wa maana. Uamuzi wangu wa kwenda PSG ulichochewa na hamu ya kuonyesha kuwa naweza kuwa nyota katika mji wangu wa nyumbani,” aliongeza Mbappe.

Matumaini ya Ballon d’Or

Katika hatua nyingine, Mbappe ambaye kwa sasa anaitumikia Real Madrid, ameeleza imani yake kuwa msimu huu anaweza kushinda tuzo ya Ballon d’Or. Akizungumza na RFI, alisema kuwa kiwango chake binafsi kimekuwa bora zaidi.

“Nimekuwa na mwaka mzuri sana kwa kiwango cha mtu binafsi, na najua hilo ndilo kigezo muhimu zaidi cha Ballon d’Or. Nilikuwa mfungaji bora kwenye mashindano makubwa yote, na nina hisia nzuri kuhusu mwaka huu,” alihitimisha staa huyo.