Lewis Hall awapiga chenga Manchester United, Newcastle wameweka ngumu

Ndoto za Man Utd zayumba kwa Lewis Hall

Manchester United wamekutana na changamoto kubwa katika harakati zao za kutaka kuimarisha safu ya ulinzi, baada ya beki wao namba moja wanayemlenga, Lewis Hall, kuanza mazungumzo ya kusaini mkataba mpya na klabu yake ya Newcastle United.

Hall, mwenye umri wa miaka 21, amekuwa kwenye rada za mabosi wa Old Trafford kwa muda mrefu kama chaguo bora kwa ajili ya kuziba nafasi ya beki wa kushoto. Ingawa inaaminika kuwa mchezaji huyo mwenyewe alikuwa tayari kutua Manchester, inaonekana Newcastle hawana mpango wowote wa kumuuza.

Newcastle wampania kumpa uongozi

Ripoti kutoka kwa mwandishi Sam Cohen zimebainisha kuwa Newcastle wanajitahidi kufanya kila liwezekanalo ili kuhakikisha kijana huyo anabaki St. James’ Park. Klabu hiyo imemwendea Hall na ofa ya mshahara mnono, huku wakimwahidi nafasi katika ‘kikosi cha uongozi’ chini ya kocha mpya, Matthias Jaissle.

“Lewis Hall yuko kwenye mazungumzo na Newcastle kuhusu mkataba mpya huku kukiwa na nia kutoka Manchester United. Mazungumzo yanajikita kwenye kuboresha maslahi yake. Hall pia ameahidiwa nafasi katika kikosi cha uongozi chini ya meneja mpya Matthias Jaissle. Manchester United wameambiwa kuwa hayupo sokoni,” alieleza Cohen.

Msimamo mkali wa Newcastle

Sio siri kuwa Newcastle wamepoteza nyota kadhaa muhimu msimu huu, wakiwemo Sandro Tonali, Bruno Guimaraes, na Anthony Gordon. Kwa sababu hiyo, hawataki kusikia habari za kumuuza Hall ambaye kwa sasa anaonekana kuwa mmoja wa wachezaji wenye thamani kubwa zaidi kikosini mwao.

Awali, Manchester United walikuwa wakiangalia njia mbadala kama vile Joaquin Seys wa Club Brugge na Jorge Salinas kutoka Racing Santander, pamoja na Myles Lewis-Skelly wa Arsenal. Hata hivyo, kocha wa Arsenal, Mikel Arteta, ameweka wazi kuwa Lewis-Skelly haendi popote.

Matumaini mapya Old Trafford

Hata hivyo, sio habari zote mbaya kwa Manchester United. Katika hali ya kuendelea kuimarisha kikosi, taarifa za karibuni kutoka kwa mchambuzi wa masuala ya usajili, Fabrizio Romano, zinaonyesha kuwa United wameanza kufanya mawasiliano na wakala maarufu Jorge Mendes kuhusu uwezekano wa kumsajili Alejandro Balde kutoka Barcelona.

Wakati huohuo, klabu hiyo inatarajiwa kukamilisha usajili wa kiungo Carlos Baleba kutoka Brighton kwa ada inayokadiriwa kufikia £70m katika siku zijazo. United pia wapo katika mchakato wa kutafuta mshambuliaji mpya, jambo ambalo linaweza kutegemea uwezo wao wa kumuuza Joshua Zirkzee.