Liverpool na Arsenal uso kwa uso kwa kinda Bartishvili, hatima ya Gakpo shakani

Liverpool wajipanga kumpiku Arsenal kwa Bartishvili

Klabu ya Liverpool imeonyesha nia ya dhati ya kuingia kwenye vita ya usajili dhidi ya Arsenal kwa ajili ya kumsajili winga kinda wa Georgia, Andria Bartishvili. Ripoti za hivi karibuni zinaeleza kuwa ‘The Reds’ wameweka mezani ofa inayofanana na ile iliyowasilishwa na Arsenal kwa ajili ya kinda huyo mwenye umri wa miaka 17.

Taarifa kutoka vyanzo vya soka nchini Georgia, Geo Team, zimebainisha kuwa kwa sasa klabu tatu zinapambana kupata saini ya mchezaji huyu chipukizi, ambazo ni Liverpool, Arsenal na klabu ya Paris FC. Ofa kutoka kwa vigogo hao wa soka la England ni sawa, ingawa Paris FC inajaribu kumshawishi kinda huyo kwa kumuahidi muda mwingi wa kucheza katika kikosi cha kwanza.

Imeelezwa kuwa Bartishvili na mawakala wake wamepanga kufanya uamuzi wa mwisho kuhusu hatima yake baada ya kumaliza mechi za kufuzu michuano ya Ulaya akiwa na klabu yake ya sasa, FC Iberia 1999. Inasemekana kuwa hadi sasa, kinda huyo bado hajafikia makubaliano yoyote na Arsenal.

Cody Gakpo huenda akaondoka Anfield

Wakati jitihada za kuimarisha kikosi cha vijana zikiendelea, hatima ya mshambuliaji wa kimataifa wa Uholanzi, Cody Gakpo, imeanza kuleta maswali. Ripoti kutoka nchini Italia kupitia Tuttosport zinaashiria kuwa nyota huyo huenda akaondoka Liverpool msimu huu wa joto, huku Tottenham Hotspur ikitajwa kuwa mstari wa mbele kumhitaji.

Inadaiwa kuwa Gakpo yuko tayari kusikiliza ofa kutoka Tottenham, na tayari mawasiliano ya awali yameshaanza kati ya pande hizo mbili. Kocha wa Spurs, Roberto De Zerbi, anatajwa kuwa ndiye anayemvutia zaidi mchezaji huyo ili akaimarishe safu yake ya ushambuliaji.

“Katika mfumo wa De Zerbi wa 4-3-3 au 4-2-3-1, Mholanzi huyo angekuwa mchezaji kamili kama winga wa kushoto. Nafasi sawa na anayocheza katika timu ya taifa, inayomruhusu kuwapa changamoto mabeki na kukata ndani kwa mguu wake wa kulia ili kupiga shuti,” ilieleza ripoti hiyo.

Mabadiliko makubwa Liverpool

Klabu ya Liverpool inapitia kipindi cha mabadiliko makubwa baada ya msimu uliopita kuwa na matokeo yasiyoridhisha chini ya Arne Slot, ambapo walimaliza katika nafasi ya tano kwenye Ligi Kuu ya England. Ujio wa kocha mpya, Andoni Iraola, unaonekana kama hatua ya kuanza upya kwa ‘The Reds’.

Klabu hiyo kwa sasa inatafuta njia mbadala za kuimarisha safu yake ya ushambuliaji, huku jina la Yan Diomande likitajwa kama mbadala sahihi wa Mohamed Salah. Wakati Gakpo akiwa na mkataba hadi mwaka 2031, mazungumzo kati ya klabu hizo yanatarajiwa kuanza hivi karibuni, ingawa Liverpool hawana haraka ya kumuuza mshambuliaji huyo kwa bei chee.