Je, Liverpool Watamuuza Cody Gakpo Kwenda Tottenham? Fabrizio Romano Afichua Ukweli

Klabu ya Tottenham Hotspur chini ya kocha wao Roberto De Zerbi, inaripotiwa kuweka macho yake kwa winga wa kimataifa wa Uholanzi na klabu ya Liverpool, Cody Gakpo. Hata hivyo, mtaalamu wa masuala ya usajili wa wachezaji barani Ulaya, Fabrizio Romano, ameweka wazi msimamo wa sasa wa Liverpool kuhusu mchezaji huyo mwenye umri wa miaka 27.

De Zerbi anataka kuimarisha safu yake ya ushambuliaji wa pembeni katika dirisha hili la usajili wa majira ya joto, na Gakpo amekuwa mmoja wa wachezaji wanaopewa kipaumbele kikubwa na miamba hiyo ya Kaskazini mwa London.

Tottenham Yagonga Hodi Anfield

Inafahamika kuwa Tottenham tayari wameanza mawasiliano ya awali na Liverpool ili kufahamu mazingira na uwezekano wa kufanya biashara hiyo. Gakpo kwa sasa yupo kwenye majukumu ya timu yake ya taifa ya Uholanzi katika michuano ya Kombe la Dunia ya mwaka 2026, ambapo amekuwa akionyesha kiwango safi.

Licha ya nia hiyo thabiti ya Spurs, Romano amebainisha kuwa mabosi wa Anfield bado hawajafanya maamuzi ya mwisho kuhusu hatimaye ya winga huyo.

Kauli ya Fabrizio Romano Kuhusu Gakpo

Akizungumza kupitia chaneli yake ya YouTube, Romano alieleza kwa kina kile kinachoendelea nyuma ya pazia kati ya klabu hizo mbili za Ligi Kuu ya Uingereza (Premier League):

“Kuna nia ya dhati kutoka Tottenham kwenda kwa Cody Gakpo. Hilo ni kweli kabisa. Ni mmoja wa wachezaji wanaowavutia sana. Lakini sakata hili la Cody Gakpo linategemea kabisa kile ambacho Liverpool watataka kufanya. Hadi sasa, Liverpool hawajaamua chochote.”

Romano aliongeza kuwa kwa sasa Liverpool hawajafungua milango ya mazungumzo ya kumuuza staa huyo, hasa kwa kuzingatia kuwa wana kocha mpya, Andoni Iraola, ambaye atashirikiana na uongozi kupanga mustakabali wa kikosi chao.

“Kwa sasa, milango haiko wazi, hivyo Liverpool hawafanyi mazungumzo ya kumuuza Gakpo. Kuna nia kutoka Tottenham, lakini wanasubiri kuona uamuzi utakaofanywa na Liverpool kuhusu winga huyo wa Kiholanzi.”

Ushindani wa Namba na Uwezekano wa Ofa Kubwa

Mwandishi mwingine wa habari za michezo, Pete O’Rourke, akizungumza kwenye podikasti ya Transfer Insider, aligusia kuwa msimu uliopita haukuwa mzuri sana kwa Gakpo huku ushindani wa namba ukiongezeka Anfield baada ya kusajiliwa kwa Victor Munoz anayecheza upande wa kushoto anaoupendelea Gakpo.

O’Rourke anaamini kuwa ingawa Liverpool hawana mpango wa haraka wa kumuuza, ofa nono inaweza kuwashawishi kubadili mawazo yao ili kupata fedha za kuimarisha maeneo mengine:

“Sidhani kama Liverpool wanatafuta kumuuza Gakpo kwa nguvu, lakini kama ofa kubwa ikija mezani, ni kitu ambacho wanaweza kukifikiria. Wanaweza kutumia kiasi hicho cha fedha kuimarisha kikosi chao katika maeneo mengine.”

Kwa sasa, mashabiki wa klabu zote mbili watabidi kusubiri na kuona ikiwa Tottenham watatuma ofa rasmi itakayoweza kuivunja ngome ya Liverpool na kumshawishi kocha Andoni Iraola kumruhusu Mdachi huyo aelekee jijini London.