Liverpool waanza mazungumzo rasmi kumsajili Bradley Barcola kutoka PSG

Hatua mpya katika dili la Barcola

Klabu ya Liverpool imeonekana kuongeza kasi katika mchakato wao wa kutaka kumsajili winga machachari wa Paris Saint-Germain, Bradley Barcola. Mtaalamu wa masuala ya usajili, Fabrizio Romano, amethibitisha kuwa klabu hizo mbili zimeanza mazungumzo rasmi ya ana kwa ana ili kuona kama makubaliano yanaweza kufikiwa.

Barcola, mwenye umri wa miaka 23, ndiye chaguo namba moja la Liverpool katika safu yao ya ushambuliaji kwa dirisha hili. Inafahamika kuwa mchezaji mwenyewe ameshaonesha nia ya kutaka kujiunga na miamba hiyo ya Anfield, jambo linalofanya mazungumzo ya maslahi binafsi kutokuwa na changamoto kubwa.

Liverpool bado wapo mbali na bei ya PSG

Ingawa mazungumzo yameanza, Romano anaeleza kuwa bado kuna umbali mkubwa kati ya ofa ya Liverpool na kile ambacho PSG wanatarajia. Liverpool wamewasilisha ofa ya awali ya takriban Euro milioni 100 (£86 milioni), kiasi ambacho bado ni kidogo ukilinganisha na matarajio ya mabingwa hao wa Ufaransa.

“Mazungumzo rasmi kati ya Liverpool na PSG kwa ajili ya Bradley Barcola yameanza, na PSG wanafahamu kuhusu nia ya Liverpool ya kutaka kutoa ofa. Hata hivyo, ofa ya awali ya Liverpool bado iko mbali na kile ambacho PSG wanatarajia,” alisema Romano.

Je, ada ya uhamisho itashuka?

Awali, iliripotiwa kuwa PSG walikuwa wanahitaji kiasi cha Euro milioni 170 (£145 milioni) ili kumwachia nyota huyo. Hata hivyo, ripoti nyingine kutoka kwa mwandishi Pete O’Rourke zinaashiria kuwa PSG wanaweza kubadilisha msimamo wao na kukubali kiasi cha Euro milioni 140 (£120 milioni).

Liverpool kwa upande wao wanajaribu kutumia mbinu ya kuweka ofa ya msingi chini ya Euro milioni 100 na kuongeza vipengele vingine (add-ons) ili kufikia makubaliano na PSG. Kwa sasa, pande zote mbili zinaendelea na mazungumzo huku kukiwa na matumaini kuwa dili hili linaweza kukamilika kutokana na hamu ya mchezaji mwenyewe kutaka kucheza soka la Uingereza chini ya mradi wa Liverpool.

Klabu ya Liverpool imesisitiza kuwa Barcola ni kipaumbele chao kikubwa na hawana mpango wa kutafuta mchezaji mwingine kama Vinicius Junior, jambo linaloonesha jinsi walivyojipanga kufanikisha usajili huu katika siku zijazo.