Liverpool yafikia makubaliano ya kumsajili Ronald Araujo kwa mkopo

Hatua kubwa kwa Liverpool

Klabu ya Liverpool imefanikiwa kufikia makubaliano ya kumsajili beki wa kati wa Barcelona, Ronald Araujo, kwa mkataba wa mkopo wa msimu mmoja. Mtaalamu wa masuala ya usajili, Fabrizio Romano, amethibitisha kuwa dili hilo limekamilika baada ya pande zote mbili kufikia mwafaka, huku mkurugenzi wa Barcelona, Deco, akitoa baraka zake.

Usajili huu unatazamwa kama hatua muhimu kwa Liverpool katika kuimarisha safu yake ya ulinzi ambayo imekuwa ikisumbuliwa na changamoto za majeruhi kwa muda sasa. Beki huyu anatarajiwa kufanyiwa vipimo vya afya siku ya Jumapili kabla ya kutambulishwa rasmi.

Maelezo ya mkataba

Mkataba huo wa mkopo unajumuisha kipengele cha Liverpool kuwa na chaguo la kumnunua mchezaji huyo moja kwa moja (buy option) ifikapo Juni 2027. Kwa mujibu wa taarifa, ada ya kumnunua imewekwa katika kiasi cha Euro milioni 55, na muhimu zaidi ni kuwa kipengele hicho sio cha lazima (non-mandatory), ikimaanisha Liverpool itakuwa na uhuru wa kuamua hatma yake kulingana na kiwango cha mchezaji.

“Ronald Araujo hajasafiri na kikosi cha Barcelona leo kwani anatarajiwa kusafiri kwenda Liverpool kesho kwa ajili ya vipimo vya afya. Kipengele cha kumnunua cha Euro milioni 55 kwa Juni 2027 si cha lazima, huku Liverpool ikibeba mzigo wa mshahara wake wote,” alisema Romano.

Safari ya Bradley Barcola

Sambamba na ujio wa Araujo, Liverpool bado inaendelea na mikakati ya kutafuta mshambuliaji mwingine. Jina la nyota wa Paris Saint-Germain (PSG), Bradley Barcola, limekuwa likitajwa sana. Ripoti zinaonyesha kuwa Liverpool iko kwenye nafasi nzuri ya kumsajili winga huyo, ingawa inakabiliwa na ushindani mkali kutoka kwa Arsenal.

PSG inaonekana kuwa na msimamo mkali kuhusu bei ya Barcola, ikiwa imeweka kiasi cha Euro milioni 150. Ingawa mchezaji mwenyewe anatamani kuondoka, hatma yake itategemea ni klabu ipi kati ya hizo mbili za Ligi Kuu ya Uingereza itakayokuwa tayari kukidhi matakwa makubwa ya kifedha yaliyowekwa na mabingwa hao wa Ufaransa.