Liverpool yaingia kwenye vita ya kumsajili Iliman Ndiaye wa Everton

Liverpool yatafuta mbadala wa Bradley Barcola

Klabu ya Liverpool imeripotiwa kuanza harakati za kutaka kumsajili mshambuliaji wa Everton, Iliman Ndiaye, katika kipindi hiki cha dirisha la usajili. Hatua hii inakuja wakati Liverpool ikionekana kuhitaji kuongeza nguvu kwenye safu yao ya ushambuliaji.

Ndiaye, ambaye amekuwa na kiwango bora ndani ya Everton katika misimu miwili iliyopita, amehusishwa na timu kadhaa kubwa nchini Uingereza, ikiwemo Arsenal na Manchester United, baada ya kuamua kubaki kwenye Ligi Kuu ya Uingereza (Premier League).

Uamuzi wa Ndiaye kubaki England

Awali, kulikuwa na taarifa kuwa mchezaji huyo alikuwa mbioni kuelekea nchini Saudi Arabia kujiunga na klabu ya Al Hilal kwa ofa nono ya pesa. Hata hivyo, mtaalamu wa masuala ya usajili, Fabrizio Romano, amethibitisha kuwa Ndiaye amekataa ofa hiyo na kuamua kubaki kwenye soka la ushindani zaidi.

Kupitia mtandao wa X, Romano alisema:

Iliman Ndiaye ameamua kutokwenda Al Hilal; anataka kubaki Premier League. Amekataa ofa ya Saudi Arabia licha ya pesa nyingi mezani; winga huyo wa Everton anataka kuendelea na soka la Uingereza, uamuzi umefanyika.

Liverpool yajipanga upya

Habari hizi zimefungua mlango kwa klabu kubwa za England kujaribu bahati yao. Kwa sasa, Liverpool inafuatilia soko kwa karibu huku wakiwa na kipaumbele cha kumpata winga mpya. Inafahamika kuwa Liverpool walikuwa wakimfukuzia kwa udi na uvumba staa wa PSG, Bradley Barcola, lakini utata wa ada ya usajili umewafanya kuanza kuangalia njia mbadala.

Ripoti zinaeleza kuwa PSG inadai kiasi cha £145m kwa ajili ya Barcola, kiasi ambacho Liverpool wameonekana kutotaka kukifikia, wakiwa wamepanga kutoa takriban £100m. Hali hii imeifanya Liverpool kugeukia kwa Ndiaye ili kupata huduma yake au kuweka presha kwa PSG ili washushe bei ya Barcola.

Everton inataka bei kubwa

Ingawa mazungumzo yameanza, dili la Ndiaye linaweza kuwa na changamoto. Everton inaripotiwa kuhitaji kiasi kisichopungua £75m kutoka kwa klabu kama Arsenal au Manchester United. Hata hivyo, inahofiwa kuwa kama Liverpool wakisisitiza kumsajili, bei hiyo inaweza kupanda zaidi kwa sababu ya ushindani wa kihistoria kati ya vilabu hivyo viwili.

Chanzo kimoja kilieleza:

Liverpool, Man United, na Arsenal wote wamefanya mazungumzo na kambi ya Ndiaye. Everton wanataka £75m, kiasi ambacho ni kikubwa sana, lakini ni dili la kufuatilia kwa karibu kwani mchezaji mwenyewe anatamani kuhama. Nina shaka kama Everton wangekubali kumuuza kwa Liverpool, na hakuna mazungumzo ya moja kwa moja ya klabu kwa klabu bado, lakini sitashangaa bei ikipanda zaidi kwa ajili yao.

Kufikia sasa, bado hakuna makubaliano yoyote rasmi, na mashabiki wanasubiri kuona kama Liverpool watafanikiwa kumnyakua staa huyo au kama wataendelea kupambana na PSG kwa ajili ya Barcola.