Liverpool yajipanga kunasa saini ya Haissem Hassan huku Cody Gakpo akitarajiwa kuondoka

Liverpool yafanya msako wa winga mpya

Klabu ya Liverpool inaonekana kuongeza kasi katika harakati zao za kusuka upya safu ya ushambuliaji kuelekea msimu ujao. Taarifa kutoka Hispania zinasema kuwa ‘The Reds’ wameanza mazungumzo rasmi na klabu ya Real Oviedo ili kumsajili winga machachari, Haissem Hassan.

Hassan, mwenye umri wa miaka 24 na raia wa Misri, amekuwa na kiwango bora ambacho kimevutia macho ya vigogo hao wa England, hasa baada ya kuonyesha uwezo wake katika michuano ya Kombe la Dunia. Inaelezwa kuwa Liverpool wana imani kubwa ya kufanikisha dili hili kwa gharama nafuu zaidi ya kipengele cha kusitisha mkataba wake cha Euro milioni 12, kutokana na hali ya Real Oviedo kushuka daraja msimu huu.

Mabadiliko makubwa Anfield

Usajili huu unaonekana kwenda sambamba na mchakato wa kuondoa baadhi ya nyota ambao hawapo kwenye mipango ya kocha mpya. Ripoti zinaashiria kuwa Cody Gakpo yupo mbioni kuondoka klabuni hapo, huku kukiwa na tetesi nyingi zinazomhusisha na kujiunga na Tottenham.

Kuondoka kwa Gakpo, pamoja na kuondoka kwa aliyekuwa nguli wa klabu hiyo Mohamed Salah, ni ishara tosha kuwa Liverpool wanafanya marekebisho makubwa. Kabla ya kumnyemelea Hassan, tayari Liverpool ilikuwa imemsajili Victor Munoz kutoka Osasuna kwa ada ya Euro milioni 40.

Bradley Barcola bado ni lengo kuu

Licha ya kuwa kwenye mazungumzo na Hassan, Liverpool haijakata tamaa katika kumpata Bradley Barcola wa Paris Saint-Germain. Mchambuzi wa masuala ya usajili, Fabrizio Romano, amethibitisha kuwa Barcola hayupo tena kwenye orodha ya wachezaji wasiouzwa na PSG.

“Liverpool na Arsenal wote wanafuatilia hali ya Barcola. Kwa Liverpool, mchezaji huyu amekuwa kwenye kipaumbele cha juu tangu dirisha la usajili la mwaka 2025,” alisema Romano.

Hata hivyo, usajili wa Barcola unaonekana kuwa mgumu na wenye gharama kubwa ikilinganishwa na Hassan ambaye anapatikana kwa dau nafuu. Mashabiki wa Anfield sasa wanatarajia kuona ni nani atakayejiunga na kikosi hicho katika harakati za kurudisha heshima ya klabu hiyo kwenye ligi.