Liverpool watafuta mrithi wa Van Dijk, Alessandro Bastoni aanikwa

Liverpool wajipanga maisha baada ya Van Dijk

Klabu ya Liverpool imeanza mikakati ya kujiimarisha kwa ajili ya siku za usoni, huku ikiripotiwa kuwa imeanza kumnyatia beki kisiki wa Inter Milan na timu ya taifa ya Italia, Alessandro Bastoni. Hatua hii inaonekana kama sehemu ya mpango wa klabu hiyo kutafuta mrithi wa nahodha wao, Virgil van Dijk.

Van Dijk, ambaye kwa sasa ana miaka 35, bado anaendelea kuwa nguzo muhimu katika safu ya ulinzi ya Liverpool na kiongozi wa kweli uwanjani na ndani ya vyumba vya kubadilishia nguo. Hata hivyo, mkataba wake unatarajiwa kumalizika mwishoni mwa msimu huu, jambo linaloifanya Liverpool kuanza kufikiria mbadala wake.

Bastoni: Beki mwenye uzoefu mkubwa

Alessandro Bastoni, mwenye umri wa miaka 27, ameonyesha kiwango cha hali ya juu nchini Italia. Katika kipindi chake na Inter Milan, amefanikiwa kutwaa taji la Serie A na Coppa Italia mara tatu kila moja. Uimara wake umemfanya atambulike kama mmoja wa mabeki bora zaidi ligini, akishinda tuzo ya beki bora wa Serie A kwa mfululizo katika misimu ya 2023/24 na 2024/25.

Taarifa zinaeleza kuwa Liverpool wamefanya uchunguzi wa kina kuhusu uwezekano wa kumnunua mchezaji huyo. Ingawa nia ipo, “The Reds” watakabiliwa na upinzani mkali kutoka kwa klabu nyingine kubwa barani Ulaya kama Chelsea, Manchester City, na Barcelona ambazo pia zimeripotiwa kuhitaji huduma ya staa huyu.

Maoni ya Ruud Gullit kuhusu usajili

Wakati suala la ulinzi likiwa kipaumbele, hadithi za usajili za Liverpool hazijakomea hapo. Mkongwe Ruud Gullit ametoa mtazamo wake kuhusu kiungo wa Barcelona, Frenkie de Jong, kama chaguo jingine ambalo Liverpool au Manchester United wanaweza kulifikiria.

“Frenkie de Jong ni chaguo la kweli kwa Liverpool au Manchester United ikiwa atakuwa fiti. Jambo la muhimu zaidi kwake ni kucheza mara kwa mara. Ikiwa hatapata nafasi Barcelona, anapaswa kutafuta klabu nyingine ambapo atacheza, kwani ni mchezaji mahiri sana,” alisema Gullit.

Kwa sasa, Liverpool wanaonekana kuwa katika mchakato wa kupima chaguzi mbalimbali ili kuhakikisha kikosi chao kinabaki kuwa imara pindi watakapopita katika kipindi cha mpito cha baada ya kuondoka kwa Virgil van Dijk.