Liverpool yamtumia ujumbe mzito Lamine Camara baada ya dili la Chelsea kufeli

Dili la Chelsea na Camara lasambaratika

Siku ya mwisho ya dirisha la usajili ilikuwa na vurugu kubwa katika klabu ya AS Monaco, hali iliyopelekea dili la kiungo wao matata, Lamine Camara, kujiunga na Chelsea kufeli katika hatua za mwisho. Inasemekana kuwa Chelsea walikuwa wamefikia makubaliano ya maandishi na Monaco kwa ajili ya mchezaji huyo, lakini uongozi wa klabu hiyo ya Ufaransa ulibadili uamuzi wao dakika za majeruhi.

Chanzo cha mabadiliko hayo ni hatima ya mshambuliaji Folarin Balogun. Awali, Monaco walikuwa wanahitaji mauzo ya mchezaji mmoja mkubwa ili kuingiza fedha, na Balogun alionekana kuwa ndiye mchezaji wa kwanza kuondoka. Hata hivyo, baada ya dili lake la kwenda Everton kupata misukosuko, Monaco waliamua kumzuia Camara. Mambo yalipokaa sawa kwa Balogun hatimaye kutimkia Everton, Monaco waliamua kubadili upepo tena, jambo lililowaacha Chelsea wakiwa na hasira kali.

Mwandishi maarufu wa masuala ya usajili, Fabrizio Romano, alithibitisha kisa hicho kupitia mtandao wa X kwa kusema:

“Dili la Lamine Camara limefeli. AS Monaco wamefuta makubaliano ya kumsajili Camara kwenda Chelsea licha ya kuwepo kwa makubaliano ya maandishi kati ya klabu hizo, hii ni baada ya kuamua kuendelea na mauzo ya Balogun kwenda Everton. Chelsea wamekasirishwa sana na wanachokiita kuwa ni mwenendo usio wa kitaalamu wa kibiashara.”

Liverpool wajipanga kwa ajili ya 2027

Kati ya vilabu vilivyokuwa vikimfuatilia kiungo huyo kabla ya Chelsea kuingia vitani ni Liverpool. Ingawa miamba hiyo ya Anfield iliamua kutomsajili Camara kwenye dirisha hili, inaonekana wamejipanga kurudi tena huko Monaco siku zijazo.

Mwandishi Ben Jacobs amedai kuwa Liverpool wametoa ujumbe mfupi na mzito kwa Monaco pamoja na mchezaji huyo mwenyewe, wakionyesha nia yao ya kuja kumnunua baadae. Ujumbe wenyewe ulikuwa ni:

“Kama hamtapata uhamisho wenu sasa, huenda tukarudi tena mwaka 2027.”

Kwa mujibu wa taarifa hizo, Monaco wanatajwa kuweka thamani ya takriban paundi milioni 60 kwa ajili ya kumuachia kiungo huyo mwenye kipaji kikubwa. Kwa sasa, Camara atabaki Monaco huku macho ya wadau wa soka yakielekezwa kwa Liverpool kuona kama kweli watarudi kwa ajili ya kumsajili nyota huyo msimu ujao.