Liverpool yamweka Bradley Barcola kuwa kipaumbele chao cha kwanza

Liverpool inahitaji huduma ya Barcola

Klabu ya Liverpool inaendelea kufanya jitihada kubwa za kutaka kumsajili winga wa Paris Saint-Germain (PSG), Bradley Barcola. Mtaalamu wa masuala ya usajili barani Ulaya, Fabrizio Romano, amesisitiza kuwa mchezaji huyo mwenye umri wa miaka 23 ndiye mlengwa mkuu wa klabu hiyo ya Anfield kwenye dirisha hili la usajili.

Licha ya kuwepo kwa uvumi mwingi kuhusu mipango ya Liverpool sokoni, Romano ameweka wazi kuwa mmiliki wa klabu hiyo, Fenway Sports Group (FSG), wanamtazama Barcola kama chaguo lao la kwanza kabisa kwa ajili ya kuimarisha safu ya ushambuliaji ya kocha Andoni Iraola.

Utofauti na ishu ya Maghnes Akliouche

Wakati jina la Bradley Barcola likihusishwa sana na Liverpool, kumekuwa na tetesi zinazowahusisha pia na winga wa AS Monaco, Maghnes Akliouche. Hata hivyo, Romano amekanusha vikali taarifa hizo na kueleza kuwa kwa sasa, Akliouche yupo kwenye mazungumzo ya karibu zaidi na PSG.

Kwa upande wa Maghnes Akliouche, nataka kuwa wazi kuwa hakuna makubaliano yoyote na Liverpool kwa sasa. Mchezaji huyo yupo kwenye mazungumzo na Paris Saint-Germain, na tayari ameshafikia makubaliano ya maslahi binafsi na klabu hiyo ya Ufaransa, alisema Romano kwenye chaneli yake ya YouTube.

Changamoto ya ada ya usajili

Bradley Barcola amekuwa na kiwango bora sana katika miaka ya hivi karibuni. Akiwa na umri wa miaka 23 tu, winga huyo ameshinda mataji matatu ya Ligue 1 na mawili ya Ligi ya Mabingwa Ulaya akiwa na PSG. Mafanikio haya yamepelekea PSG kuweka bei ya €150 milioni (takriban pauni milioni 128) kwa yeyote anayehitaji huduma yake.

Romano anakiri kuwa usajili huu unaweza kuwa na changamoto kubwa za kifedha, lakini hilo halijawazuia Liverpool kuendelea kumuwania mchezaji huyo.

“Barcola ni mlengwa namba moja, namba mbili na namba tatu kwa Liverpool. Nawajua wengi wana mashaka kama jambo hili linawezekana kiuchumi, lakini ukweli ni kwamba Liverpool bado wanatamani sana kumnasa,” aliongeza Romano.

Wakati dirisha la usajili likiendelea, macho ya mashabiki wa Liverpool yameelekezwa kuona kama klabu yao itafanikiwa kuvunja benki ili kumpata staa huyu ambaye amekuwa muhimili mkubwa katika kikosi cha PSG na timu ya taifa ya Ufaransa.