Liverpool yaonyesha nia ya kumsajili Bradley Barcola, Cody Gakpo hatarini kuondoka

Liverpool yapanga kufanya mapinduzi safu ya ushambuliaji

Klabu ya Liverpool inaendelea na mikakati yake ya kusuka upya safu ya ushambuliaji katika dirisha hili la usajili. Taarifa kutoka nchini Uingereza zinaeleza kuwa klabu hiyo ipo kwenye mazungumzo na matumaini ya kumsajili winga machachari wa Paris Saint-Germain (PSG), Bradley Barcola.

Tangu kuondoka kwa Mohamed Salah, Liverpool imekuwa ikitafuta mbadala wa kudumu katika nafasi ya winga, baada ya kushindwa kufanikisha usajili wa wachezaji kama Yan Diomande na Michael Olise. Sasa, akili zote za mabosi wa Anfield zimeelekezwa kwa Barcola, ambaye ameshaonyesha nia ya kutaka changamoto mpya nchini Uingereza.

Barcola anataka Anfield

Inaripotiwa kuwa Bradley Barcola amewaambia viongozi wa PSG kuwa hana mpango wa kuongeza mkataba wake unaomalizika mwaka 2028. Hali hii imeipa Liverpool nguvu ya kusonga mbele katika mazungumzo. Ingawa PSG wanatajwa kuhitaji kiasi cha paundi milioni 120, Liverpool wanaamini wanaweza kukamilisha dili hilo kwa dau la chini ya paundi milioni 100 pamoja na viongezeo vingine.

Mwandishi wa habari za michezo, Pete O’Rourke, amethibitisha kuwa kuna matumaini makubwa klabuni hapo kuhusu dili hili:

“Tatizo kubwa ni kukubaliana bei na PSG. Wao wanahitaji kiasi kikubwa, lakini Liverpool hawataki kufika huko. Wana matumaini wanaweza kupata saini yake kwa chini ya milioni 100, jambo ambalo linawezekana kutokana na mchezaji mwenyewe kuonyesha nia ya kutaka kuhamia Anfield.”

Cody Gakpo njiani kutokea?

Kufika kwa Barcola huenda kukafunga mlango wa Cody Gakpo kikosini. Mshambuliaji huyo wa Uholanzi hakuwa katika kiwango chake bora msimu uliopita, na kwa ujio wa chipukizi Rio Ngumoha, nafasi ya Gakpo inazidi kuwa finyu.

Taarifa zinaeleza kuwa Liverpool wapo tayari kumsikiliza yeyote mwenye nia ya kumsajili Gakpo, huku wakiweka bei elekezi ya paundi milioni 72 (kama euro milioni 85). Klabu ya Tottenham Hotspur inatajwa kuwa miongoni mwa timu zinazomfuatilia kwa ukaribu mshambuliaji huyo.

Bei hiyo imepangwa kwa kulinganisha na usajili wa Anthony Gordon aliyetimkia Barcelona kwa paundi milioni 69. Liverpool wanaamini kuwa Gakpo ana uzoefu zaidi na uwezo mkubwa uliothibitika, hivyo anapaswa kuwa na thamani kubwa zaidi sokoni.