Liverpool yatajwa kumsajili nyota wa Bournemouth kwa pauni milioni 130

Klabu ya Liverpool inaonekana kuongeza kasi katika dirisha hili la usajili huku mjadala kuhusu nani atachukua nafasi ya Mohamed Salah ukipamba moto. Mchambuzi wa soka na gwiji wa zamani wa England, Alan Shearer, amedai kuwa Liverpool inahitaji kufanya usajili wa maana ili kurejesha makali yake, huku mshambuliaji wa Bournemouth, Rayan, akitajwa kuwa mchezaji anayeweza kuleta mabadiliko.

Hadi sasa, Liverpool imefanikiwa kumsajili Victor Munoz kutoka Osasuna kwa ada ya Euro milioni 60, pamoja na beki kijana kutoka Rennes, Jeremy Jacquet. Hata hivyo, wengi wanaamini kuwa kikosi hicho bado kina mapungufu makubwa yanayohitaji kuzibwa kabla ya msimu mpya kuanza.

Umuhimu wa kuziba pengo la Salah

Akizungumzia uwezekano wa Liverpool kumnasa Rayan, Shearer aliliambia Betfair:

“Ndiyo, hilo litakuwa jambo kubwa. Ni wazi wanapaswa kutafuta mbadala wa Salah upande huo. Rayan amefanya kazi vizuri na Andoni Iraola msimu uliopita na dhahiri anaelekea kwenye mambo makubwa. Liverpool inahitaji kufanya usajili mkubwa wawili au watatu, na huyu angekuwa mwanzo mzuri.”

Kwa sasa, Bournemouth bado wanashikilia hatima ya mchezaji huyo, kwani kipengele cha kuvunja mkataba wake cha pauni milioni 130 hakitaanza kutumika hadi msimu wa 2027. Hii ina maana Liverpool italazimika kufanya mazungumzo makali kama wanataka kumpata staa huyo wa Brazil wakati huu.

Mashaka ya Steve Nicol

Wakati Shearer akiona matumaini, gwiji mwingine wa Liverpool, Steve Nicol, anaonekana kutofurahishwa na mwenendo wa klabu hiyo sokoni. Nicol amesema anashangazwa na jinsi klabu inavyofanya kazi zake, hasa baada ya kumsajili Munoz.

“Nimeshtuka sana. Maandalizi ya msimu yameshaanza. Wameacha wachezaji wengi zaidi kuondoka kuliko walivyosajili. Victor Munoz ni kitendawili, na ndio basi tena? Sijui niseme nini,” alisema Nicol kupitia ESPN FC.

Nicol aliongeza kuwa Liverpool inahitaji kusajili wachezaji watano au sita ili kuimarisha kikosi chao, akionya kuwa kuchelewa kwa usajili kutailazimu klabu hiyo kufanya maamuzi ya kukurupuka ambayo yanaweza kugharimu timu msimu ujao. Kwa sasa, mashabiki wa Liverpool wanaendelea kusubiri kuona hatua gani nyingine uongozi wa FSG utachukua katika kuimarisha kikosi hicho.