Liverpool yaweka mipango mipya kwa Alisson Becker na Federico Chiesa

Liverpool yaanza maisha bila Alisson

Klabu ya Liverpool imeripotiwa kufikia uamuzi mzito kuhusu kipa wao tegemeo, Alisson Becker. Habari za ndani zinaeleza kuwa klabu hiyo haina mpango wa kumuongezea mkataba mpya kipa huyo raia wa Brazil.

Ingawa Alisson bado anaonekana kuwa mmoja wa makipa bora duniani na amekuwa na mwanzo mzuri wa msimu huu, klabu inaonekana kujiandaa na maisha ya baada yake. Tatizo la majeraha ya mara kwa mara limeonekana kuwa sababu kubwa inayowafanya viongozi wa Anfield kusita kumpa mkataba mpya.

Akizungumzia hali hiyo, aliyekuwa mkuu wa skauti katika Ligi Kuu ya England, Mick Brown, amedokeza kuwa mazungumzo ya ndani yamefanyika kuhusu hatima ya kipa huyo.

“Ni kitu ambacho Liverpool wamejadili ndani kwa ndani, kwa sababu uamuzi unapaswa kufanyika. Pengine wanafikiria wanaweza kuleta chaguo lingine la kijana zaidi na ambalo ni la kutegemewa zaidi,” alisema Brown.

Kwa sasa, Liverpool tayari imeshaanza kuimarisha eneo la lango kwa kumsajili Giorgi Mamardashvili, sambamba na chipukizi Lucca Brughmans mwenye umri wa miaka 18. Hii inaashiria kuwa klabu inajenga msingi wa muda mrefu bila kipa huyo mwenye uzoefu.

Federico Chiesa kuondoka Januari?

Katika upande mwingine, mshambuliaji Federico Chiesa naye anatajwa kuwa hatarini kuondoka klabuni hapo ifikapo mwaka 2027. Kwa mujibu wa ripoti, mchezaji huyo ana mpango wa kutafuta changamoto mpya ikiwa hali yake ya kupata dakika za kucheza haitabadilika.

Chiesa, ambaye kwa sasa yupo nje ya dimba kutokana na majeraha ya misuli, anatarajiwa kurejea mazoezini wakati wa mapumziko ya kimataifa ya mwezi huu. Hata hivyo, ikiwa hatopata nafasi ya kutosha kikosini, inasemekana kuwa anapanga kuondoka kwenye dirisha la usajili la Januari.

Mshambuliaji huyo wa Italia alihusishwa na vilabu kadhaa vya Serie A wakati wa dirisha la majira ya joto, na inaonekana kuwa kurejea Italia kunaweza kuwa chaguo lake la msingi ikiwa mambo hayataenda sawa pale Anfield.