Liverpool yaweka msimamo kuhusu Rio Ngumoha huku ikisaka saini ya Bradley Barcola

Ngumoha ni mali isiyouzika

Klabu ya Liverpool imeweka wazi msimamo wake kuhusu kinda wao matata mwenye umri wa miaka 17, Rio Ngumoha, ikisisitiza kuwa mchezaji huyo ni miongoni mwa nyota wasioweza kuuzwa katika dirisha hili la usajili.

Licha ya taarifa kuashiria kuwa Liverpool iko kwenye mchakato wa kusajili mawinga wawili wapya, mtaalamu wa masuala ya usajili, Fabrizio Romano, amethibitisha kuwa nafasi ya Ngumoha katika kikosi cha The Reds iko salama. Hii ni habari njema kwa mashabiki wanaomuona kijana huyo kama sehemu muhimu ya sasa na ya baadaye ya klabu hiyo.

Kuna taarifa zilizokuwa zikidai kuwa klabu ya Bayern Munich ilikuwa ikimfuatilia mchezaji huyo tangu mwezi Juni, lakini Liverpool imekuwa ikigoma katakata kuachana na kipaji hicho kikubwa.

“Ili kuweka mambo sawa, iwe Barcola atakuja au la, au hata kama wataongeza mawinga wawili, Rio Ngumoha hauzwi. Rio hajawahi kuwa karibu kujiunga na Bayern msimu huu. Kwangu mimi, Rio ni sehemu muhimu sana ya mradi wa Liverpool wa sasa na ujao,” alisema Romano kupitia chaneli yake ya YouTube.

Liverpool katika harakati za Bradley Barcola

Wakati Ngumoha akibaki kuwa chaguo la kwanza la kocha Andoni Iraola kwa ajili ya maendeleo ya baadaye, Liverpool inaendelea na msako mkali wa kuimarisha safu yake ya ushambuliaji. Hii ni baada ya klabu hiyo kumsajili Victor Munoz kutoka Osasuna kwa kitita cha Euro milioni 40.

Klabu hiyo kwa sasa iko kwenye mazungumzo ya kila siku na Paris Saint-Germain (PSG) ili kumpata winga Bradley Barcola. Romano amethibitisha kuwa tayari kuna makubaliano ya awali kati ya Liverpool na mchezaji huyo mwenyewe.

“Liverpool inazungumza kila siku na PSG kwa ajili ya Bradley Barcola. Tayari wamekubaliana maslahi binafsi na mchezaji ambaye ana shauku kubwa ya kutua Anfield. Liverpool wako tayari kupambana kumpata, lakini sasa inategemea na makubaliano ya kifedha kati ya klabu hizo mbili,” aliongeza Romano.

Changamoto za kifedha na soko la usajili

Liverpool inajaribu kupunguza gharama za usajili wa Barcola, ikilenga kushusha ada hiyo kutoka pauni milioni 145 hadi kufikia pauni milioni 120 au chini ya hapo. Hata hivyo, kuna ripoti zinazotofautiana, huku chombo cha habari cha Ufaransa, L’Equipe, kikidai kuwa mazungumzo hayo yamesitishwa kwa muda.

Klabu hiyo pia inalazimika kuimarisha safu ya ushambuliaji kutokana na sababu kadhaa, ikiwemo kutafuta mrithi wa Mohamed Salah, upasuaji wa Hugo Ekitike utakaomweka nje hadi Desemba, na uvumi unaomhusisha Cody Gakpo na Tottenham Hotspur.

Licha ya presha hiyo yote ya kusaka washambuliaji wapya, msimamo wa Liverpool kuhusu Ngumoha unabaki kuwa ishara ya imani yao kubwa kwa chipukizi huyo katika kuijenga timu yao ya ushindani.