Mustakabali wa Luke Shaw Manchester United mashakani, miamba hiyo yamrejea Jarrad Branthwaite

Hatima ya Luke Shaw Old Trafford

Mustakabali wa beki wa kushoto wa Manchester United, Luke Shaw, ndani ya klabu hiyo unaonekana kufika mwisho. Ripoti za hivi karibuni zinaeleza kuwa mchezaji huyo mwenye uzoefu mkubwa huenda akaondoka klabuni hapo mwishoni mwa msimu huu, kufuatia kumalizika kwa mkataba wake.

Shaw, ambaye ni mmoja wa wachezaji waliodumu kwa muda mrefu zaidi ndani ya Manchester United, amekumbwa na changamoto nyingi za majeruhi ambazo zimekuwa zikimfanya akose michezo mingi muhimu. Ingawa msimu uliopita alionyesha kiwango kizuri na kuwa fiti kwa muda mrefu, kuanza kwa msimu huu kwa kusumbuliwa tena na majeraha kumezidi kuibua hofu kwa uongozi wa klabu.

Taarifa kutoka ndani ya klabu hiyo zinaashiria kuwa kwa sasa hakuna dalili zozote za kuongezewa mkataba mpya. Hali hii inawafanya United kuanza kufikiria mbadala wa kudumu katika eneo la beki wa kushoto, baada ya kushindwa kumnasa Lewis Hall kutoka Newcastle United kwenye dirisha la usajili lililopita.

Mabadiliko makubwa katika safu ya ulinzi

Sio Luke Shaw pekee anayekabiliwa na sintofahamu. Manchester United inaonekana kujiandaa na mabadiliko makubwa katika safu yake ya ulinzi. Wachezaji kama Harry Maguire na Lisandro Martinez nao wapo katika hatari ya kuondoka, ingawa klabu ina chaguo la kuwaongezea mikataba ya mwaka mmoja zaidi.

Mathayo De Ligt naye amekuwa nje ya uwanja kwa takriban mwaka mmoja baada ya kufanyiwa upasuaji wa mgongo, jambo ambalo limeifanya United kuweka mipango ya muda mrefu ya kuboresha safu yake ya ulinzi ili kuendana na ushindani wa Ligi Kuu ya England.

United wamrejea Jarrad Branthwaite

Katika harakati za kuimarisha ukuta wao, Manchester United wameripotiwa kurejea mezani kwa ajili ya kumwania beki kisiki wa Everton, Jarrad Branthwaite. United wamekuwa wakimfuatilia beki huyo kwa muda mrefu na sasa wameanza kufanya mawasiliano mapya.

Branthwaite, mwenye umri wa miaka 24, amekuwa na kiwango bora msimu huu huku akiwa amepona majeraha yaliyokuwa yakimsumbua. Hata hivyo, dili hili halitakuwa rahisi kwa United kwani Everton imeweka wazi kuwa haina haraka ya kumuuza mchezaji wake huyo.

“United wanapanga maisha baada ya Harry Maguire na Lisandro Martinez, huku mabadiliko katika chaguzi zao za ulinzi wa kati yakitarajiwa kutokea mapema kama mwaka 2027,” ripoti zimebainisha.

Thamani ya Branthwaite kwa sasa inatajwa kufikia pauni milioni 80, kiwango ambacho kinaonyesha jinsi Everton ilivyo na imani na ubora wa beki huyo. Usajili huu utakuwa kipaumbele kwa United wanapoelekea kukijenga upya kikosi chao kwa ajili ya changamoto za baadaye.