Michael Carrick asisitiza Amad Diallo habadiliki ndani ya Man Utd

Msimamo wa Carrick kwa Amad Diallo

Mtaalamu wa masuala ya usajili barani Ulaya, Fabrizio Romano, ameweka wazi kuwa kocha wa Manchester United, Michael Carrick, hana mpango wa kumuuza mshambuliaji wake chipukizi, Amad Diallo, katika dirisha hili la usajili.

Kumekuwa na taarifa nyingi kutoka nchini Italia zikiusisha klabu ya AC Milan na nia ya kumsajili staa huyo kutoka Ivory Coast. Hata hivyo, Romano amesisitiza kuwa ndani ya Manchester United, msimamo ni thabiti na haujabadilika.

Akizungumza kupitia chaneli yake ya YouTube, Romano alisema:

“Msimamo wa Manchester United uko wazi sana. Amad Diallo hauzwi katika dirisha hili la usajili. Michael Carrick ameshaweka wazi uamuzi wake kwa uongozi wa klabu, na Manchester United wanatarajia Amad Diallo kubaki kama sehemu ya mipango yao kwa msimu mpya.”

Imani ya Carrick kwa Diallo

Licha ya kuwepo kwa tetesi hizo, kocha Michael Carrick amekuwa akionyesha imani kubwa kwa mchezaji huyo. Mapema mwezi Mei, Carrick alimsifia Diallo kwa kiwango chake na mchango wake mkubwa uwanjani, akisisitiza kuwa anathamini zaidi kazi yake kuliko tu takwimu za mabao.

“Nafikiri anacheza vizuri sana. Anatoa mchango mkubwa kwa timu. Ana kipaji kikubwa na uwezo mkubwa, lakini pia bidii yake na mtazamo wake ni wa kipekee. Mimi ni shabiki mkubwa wa Amad,” alisema Carrick.

Mabadiliko ya kikosi Old Trafford

Manchester United wapo kwenye mchakato wa kuimarisha kikosi chao baada ya kumaliza msimu katika nafasi ya tatu kwenye msimamo wa Ligi Kuu ya England (Premier League), jambo lililowapa tiketi ya kushiriki michuano ya Ligi ya Mabingwa Ulaya (Champions League).

Klabu hiyo kwa sasa inatafuta kuongeza nguvu katika nafasi ya kiungo, beki wa kushoto, na winga wa kushoto ili kumsaidia Carrick kuleta ushindani zaidi msimu ujao. Tayari kumekuwa na mabadiliko kadhaa, ikiwemo kuondoka kwa Rasmus Hojlund aliyejiunga na Napoli kwa ada ya pauni milioni 38.

Kwa sasa, mashabiki wa United wanaweza kupumua kwani Amad Diallo anaonekana kuwa sehemu muhimu ya ujenzi wa kikosi cha Carrick kwa ajili ya changamoto za msimu ujao.