Manchester United yafikiria kumleta mshambuliaji mpya kwa mkopo baada ya ofa ya Fiorentina

Zirkzee njiani kuelekea Italia?

Klabu ya Fiorentina imeonyesha nia kubwa ya kumsajili mshambuliaji wa Manchester United, Joshua Zirkzee, kwa njia ya mkopo. Ripoti za kuaminika kutoka kwa mtaalamu wa usajili Fabrizio Romano, zinasema kuwa klabu hiyo ya Serie A imeshatuma ofa rasmi kwa ajili ya kumchukua mshambuliaji huyo wa Uholanzi.

Ofa hiyo inahusisha ada ya mkopo ya Euro milioni 5, huku kukiwa na kipengele cha klabu hiyo kuwa na chaguo la kumnunua mchezaji huyo moja kwa moja baadaye. Kwa sasa, Manchester United na kambi ya Zirkzee wanatathmini ofa hiyo kabla ya kufikia uamuzi wa mwisho.

Utafutaji wa mbadala

Kutokana na hatua hiyo, Manchester United inaonekana kujiandaa na maisha bila Zirkzee. Wachambuzi wa mambo wanasema kuwa iwapo Zirkzee ataondoka, United italazimika kuleta mshambuliaji mwingine ili kuongeza nguvu katika safu yao ya ushambuliaji ambayo kwa sasa inamuitegemea zaidi Benjamin Sesko.

Kwenye podikasti ya Talk of the Devils, mwandishi Andy Mitten amedokeza kuwa kuna uwezekano mkubwa wa United kuingia sokoni kutafuta mbadala wa Zirkzee. Mitten alisisitiza:

“Je tutaona wachezaji wapya wakija? Nafikiri uwezekano unaongezeka. Sijui kama atakuwa mchezaji wa kusajiliwa moja kwa moja au kwa mkopo, lakini ukipoteza mshambuliaji, United inaonekana kuwa na upungufu kule mbele.”

Kauli hiyo iliungwa mkono na Laurie Whitwell, ambaye aliongeza kuwa mpango wa United kumsajili mshambuliaji yeyote mpya kwa sasa utakuwa ni wa mkopo.

Igor Matanovic kwenye rada?

Jina la mshambuliaji wa Freiburg, Igor Matanovic, limeanza kuhusishwa na klabu hiyo ya Old Trafford kama chaguo linaloweza kuchukua nafasi ya Zirkzee. Mchezaji huyu wa kimataifa wa Croatia anaonekana kuwa miongoni mwa walengwa wanaoweza kuisaidia United.

Maoni ya Alan Shearer

Gwiji wa Newcastle United, Alan Shearer, ametoa mtazamo wake kuhusu hitaji la United kuimarisha safu ya ushambuliaji. Kwa mujibu wa Shearer, bila kujali hatima ya Zirkzee, United inahitaji mshambuliaji mwingine ili kufikia viwango vya juu zaidi.

“Nafikiri kwa wao kufikia ngazi nyingine wanahitaji mshambuliaji mwingine. Sifikiri kama wako vizuri sana upande wa ulinzi, lakini pia naona wana upungufu katika nafasi ya katikati ya ushambuliaji (centre-forward),” alisema Shearer.

Wakati dirisha la usajili likielekea kufungwa, mashabiki wa United wanaendelea kusubiri kuona kama uongozi wa INEOS utafanikiwa kuziba pengo hilo ili kuimarisha kikosi kwa msimu huu.