Manchester United yataka Aurelien Tchouameni apunguze mshahara ili kutua Old Trafford

United yamtaka Tchouameni kama mrithi wa Casemiro

Manchester United inaonekana kuweka nguvu zake zote katika kumsajili kiungo mkabaji wa Real Madrid, Aurelien Tchouameni, ambaye anaonekana kuwa chaguo namba moja la klabu hiyo katika dirisha hili la usajili.

Mwandishi maarufu wa masuala ya usajili, Fabrizio Romano, ameweka wazi kuwa ndani ya Manchester United, Tchouameni anatazamwa kama mchezaji bora mwenye kiwango cha juu na akili ya soka inayoweza kuleta mabadiliko makubwa kikosini. Mfaransa huyo anaonekana kuwa mbadala sahihi wa muda mrefu wa Casemiro.

Changamoto mbili kubwa kwa United

Licha ya kuvutiwa na uwezo wake, Romano ameeleza kuwa kuna vikwazo viwili vikubwa vinavyoweza kuifanya dili hiyo kuwa ngumu kufanikiwa. Jambo la kwanza na kubwa zaidi ni suala la mshahara.

“Tchouameni anapokea mshahara mkubwa sana huko Real Madrid. Kwa sasa, Manchester United imeshaweka wazi kwa watu wa karibu wa mchezaji huyo kupitia mazungumzo yao ya miezi ya hivi karibuni, kuwa njia pekee ya yeye kujiunga na Old Trafford ni kukubali kupokea mshahara tofauti na anaoupata sasa,” alisema Romano.

Hivyo, United inamtaka staa huyo apunguze madai yake ya mshahara ili aendane na mfumo wa klabu hiyo, jambo ambalo linaonekana kuwa kikwazo kikubwa kwa sasa.

Real Madrid bado haijatoa baraka

Kikwazo cha pili ambacho Manchester United inakabiliana nacho ni msimamo wa Real Madrid. Klabu hiyo ya Hispania inaonekana kutokuwa tayari kumuachia kiungo wake kwa urahisi, huku kukiwa na taarifa kuwa wanahitaji kiasi kisichopungua Euro milioni 100 ili kuanza mazungumzo.

Romano aliongeza kuwa mpaka sasa, Manchester United haijapokea ishara yoyote kutoka kwa mabingwa hao wa Ulaya inayoweza kuashiria kuwa wako tayari kukaa mezani na kuanza mazungumzo rasmi.

“Kwa sasa, hawajapokea ujumbe wowote kutoka Madrid wa kusema ‘sawa, hebu tukae mezani na tujaribu kufikia makubaliano’. Kwa hiyo, swali ni je, anaweza kuwa usajili wa ndoto wa Man Utd? Bila shaka. Ni mchezaji ambaye wanamkubali sana, lakini hali ni ngumu kutokana na mshahara na maamuzi ya Real Madrid,” alihitimisha Romano.

Hadi sasa, inaonekana United inaendelea kufuatilia hali ya mchezaji huyo mwenye mkataba na Madrid hadi mwaka 2028, huku mashabiki wakiwa na hamu ya kuona kama uongozi wa INEOS utafanikiwa kumshawishi kiungo huyo mwenye kipaji kikubwa.