Manchester City hatarini kushushwa daraja kufuatia tuhuma za uvunjifu wa sheria za kifedha

Hali ni tete Etihad

Mabingwa wa Ligi Kuu ya England, Manchester City, wako kwenye wakati mgumu baada ya ripoti kuibuka kuwa klabu hiyo huenda ikakumbwa na adhabu nzito, ikiwemo kushushwa daraja, kufuatia tuhuma za kukiuka kanuni za matumizi ya kifedha (FFP).

Kwa mujibu wa taarifa za hivi karibuni, klabu hiyo imebainika kuwa na hatia katika tuhuma 114 kati ya 115 zilizokuwa zikiiandama. Ingawa uongozi wa Ligi Kuu ya England (Premier League) na Manchester City bado hawajatoa tamko rasmi kuthibitisha au kukanusha uamuzi huo, shinikizo ni kubwa kwa mamlaka husika kuchukua hatua stahiki.

Adhabu nzito zapendekezwa

Mchambuzi wa mambo ya soka, Ben Jacobs, amedai kuwa Ligi Kuu ya England imekuwa ikishinikiza klabu hiyo kupata adhabu kali ili kuweka historia na mfano kwa wengine. Jacobs anaamini kuwa hatua ya kuwashusha daraja ni chaguo ambalo linaangaliwa kwa umakini mkubwa.

“Uelewa wangu ni kwamba Ligi Kuu ya England inashinikiza kupata adhabu ya kihistoria na nzito, ikiwemo kupokonywa pointi nyingi na hata kuishusha Manchester City daraja. Kuna hatari ya klabu hiyo kutolewa kabisa kwenye mfumo wa ligi za Uingereza kama uamuzi huu utatekelezwa,” alisema Jacobs.

”Lazima watoe fundisho”

Kwa upande wake, aliyekuwa mtaalamu wa kusaka vipaji katika Ligi Kuu, Mick Brown, anaamini kuwa mamlaka ziko tayari kutoa adhabu tatu kwa mkupuo ili kuonyesha uzito wa makosa yaliyofanyika. Kwa maoni yake, faini kubwa, kupokonywa pointi, na kushushwa daraja ni mambo ambayo yanaweza kutokea.

“Ni wazi kuwa kulikuwa na mambo yasiyo sawa kwa muda mrefu, na sasa wako tayari kuchukua hatua. Ikiwa tuhuma zote 114 zitathibitishwa rasmi, basi kuna misingi ya kuwakata pointi, kuwashusha daraja, na kuwatoza faini kubwa. Njia pekee ya kumaliza utata huu ni kufanya uamuzi mgumu,” aliongeza Brown.

Nini kinafuata?

Kama adhabu hizo zitatolewa, itakuwa ni pigo kubwa kwa klabu hiyo ambayo imekuwa ikitawala soka la Uingereza kwa kipindi kirefu. Mashabiki na wadau wa soka duniani wanaendelea kusubiri taarifa rasmi kutoka kwa Ligi Kuu ya England kuhusu hatima ya kesi hii nzito.

Kwa sasa, Manchester City inabaki kwenye presha huku ikisubiri maamuzi yatakayotolewa baada ya mchakato wa kisheria kukamilika, ikiwa ni pamoja na uwezekano wa klabu hiyo kukata rufaa dhidi ya adhabu yoyote watakayopewa.