Manchester City: Khaldoon Al Mubarak avunja ukimya kuhusu mashtaka ya FFP

Mwenyekiti wa Man City aelezea msimamo wake

Mwenyekiti wa Manchester City, Khaldoon Al Mubarak, ametoa tamko zito akisisitiza kuwa klabu hiyo bado ina imani kubwa ya kuthibitisha kutokuwa na hatia mbele ya mamlaka, licha ya ripoti kuibuka kuwa wamepatikana na hatia katika mashtaka mengi kati ya 115 yaliyokuwa yakiikabili klabu hiyo.

Mashtaka hayo, ambayo yamekuwa yakichunguzwa na Premier League kwa kipindi cha miaka minne, yanahusu utoaji wa taarifa za uongo za kifedha kati ya mwaka 2009 na 2018. Miongoni mwa madai hayo ni pamoja na kufichwa kwa malipo ya mishahara ya makocha na wachezaji, pamoja na kuongezwa kwa thamani ya mikataba ya udhamini ili kuficha chanzo halisi cha fedha za wamiliki.

Ujumbe wa Mubarak kwa mashabiki

Katika barua yake kwa mashabiki, Mubarak alieleza kuwa klabu hiyo haitayumba na itaendelea na mchakato wa kisheria ili kusafisha jina lake. Alisisitiza kuwa kuna watu wanaojaribu kuidhoofisha klabu hiyo lakini hawatapata nafasi hiyo.

“Mchakato wa Premier League bado una safari ndefu, na imani yetu pamoja na nia yetu ya kuthibitisha kutokuwa na hatia kwa klabu bado iko imara kama ilivyokuwa tangu mwanzo. Kuna mambo mengi ningependa kushiriki nanyi ili kuelewa kwa nini tuna imani kubwa na msimamo wetu, lakini siri ya mchakato wa kisheria inanilazimu kusubiri,” alisema Mubarak.

Klabu ya Manchester City kupitia taarifa rasmi, imesisitiza kuwa wamekuwa wakifuata misingi ya kisheria kwa miaka minane na wanatarajia Premier League kutenda haki bila kuegemea upande wowote.

Tahadhari ya Christian Purslow

Wakati huohuo, aliyekuwa mkurugenzi wa Liverpool, Christian Purslow, ametoa onyo kali kuhusu athari za kesi hii kwenye soka la Uingereza kwa ujumla. Kulingana na Purslow, uamuzi huu unaweza kusababisha mlolongo wa madai ya kisheria kutoka kwa klabu nyingine ambazo zimeathirika kiuchumi kwa miaka yote tisa ambayo klabu imepatikana na hatia.

“Kama utaangalia kila msimu kati ya ile tisa ambayo Manchester City imevunja kanuni, utaona kuwa washindani wao 19 walipata hasara. Timu zilizokosa nafasi ya kucheza Ligi ya Mabingwa zimepoteza mamilioni ya pauni, bila kusahau timu zilizoshushwa daraja ambazo pengine zisingeshuka kama si Man City. Uwezekano wa hali hii kuharibika zaidi ni mkubwa sana,” alionya Purslow.

Purslow alihitimisha kwa kutoa rai ya kutafuta suluhu ya pamoja ili kuepuka mzozo wa kisheria usio na mwisho ambao unaweza kudumu kwa miaka mingine mitano, jambo ambalo alilitaja kuwa ni hatari kwa taswira ya soka la Uingereza.