Manchester City na Barcelona zapata kigugumizi kwa chipukizi wa Bournemouth

Changamoto ya kumsajili Junior Kroupi

Klabu kubwa za Ulaya, Manchester City na Barcelona, zimejikuta katika wakati mgumu katika harakati zao za kusaka saini ya mshambuliaji chipukizi wa Bournemouth, Junior Kroupi. Mchezaji huyu raia wa Ufaransa mwenye umri wa miaka 20, amekuwa kivutio kikubwa baada ya kuonyesha kiwango bora msimu uliopita kwa kufunga mabao 13.

Kulingana na mtaalamu wa masuala ya usajili, Fabrizio Romano, klabu zote mbili zimeanza kufanya mawasiliano ili kujaribu kumpata mshambuliaji huyo wa zamani wa Lorient, lakini zimekutana na ukuta mgumu kutoka kwa Bournemouth ambao hawana mpango wa kumuuza nyota huyo msimu huu.

Hali ya Julian Alvarez kuathiri mipango ya Barcelona

Barcelona wamekuwa wakimwinda kwa udi na uvumba Julian Alvarez ili kuziba pengo la Robert Lewandowski, hata hivyo, mambo yanaonekana kuwa magumu zaidi. Atletico Madrid wamegoma kumwachia mchezaji huyo, jambo ambalo limewalazimu wababe hao wa La Liga kuanza kutazama njia mbadala.

Romano alieleza hali hiyo kwenye chaneli yake ya YouTube:

“Hali kwa Barcelona kuhusu Julian Alvarez inazidi kuwa ngumu. Atletico Madrid hawafungui milango ya kuondoka kwa Julian, hivyo Barca wameanza kufikiria machaguo mengine. Jina moja la kulifuatilia katika wiki zijazo ni Junior Kroupi.”

Mchuano wa Man City na Barcelona

Sio Barcelona pekee wanaomfukuzia Kroupi, bali hata Manchester City nao wameweka nia ya kutaka huduma za mchezaji huyo. Hata hivyo, wataalamu wa soko la usajili wanaamini kuwa dili hili ni gumu kwa klabu zote mbili.

Romano aliongeza kuwa:

“Manchester City ni klabu nyingine inayomfuatilia kwa karibu Kroupi, lakini kwa sasa tatizo ni lilelile. Iwe ni Barcelona au Manchester City, Bournemouth wanataka kumbakiza mchezaji huyo klabuni. Kwa hiyo si dili rahisi, lakini Barcelona wameanza mazungumzo kuona kama kuna uwezekano.”

Kwa sasa, Bournemouth wanaonekana kuwa na msimamo thabiti wa kutotaka kumuachia Kroupi, jambo linalofanya mbio za kumsajili mshambuliaji huyo kuwa mtihani mkubwa kwa klabu hizo kubwa barani Ulaya.