Manchester City wamnyemelea Enzo Fernandez huku Rodri akihusishwa na Real Madrid

Mabadiliko makubwa yanayoweza kutikisa soko la usajili

Manchester City wanaonekana kuwa katika mchakato wa kusuka upya safu yao ya kiungo baada ya kuibuka kwa taarifa kwamba wanamnyemelea kiungo wa Chelsea, Enzo Fernandez. Hatua hii inakuja wakati huu klabu hiyo ya Etihad ikikabiliwa na tishio la kumpoteza kiungo wao tegemeo, Rodri, anayewindwa na miamba ya soka ya Uhispania, Real Madrid.

Ripoti kutoka kwa vyombo mbalimbali vya habari zinaonyesha kuwa Real Madrid wamejipanga kuwasilisha ofa yao ya kwanza kwa City ili kunasa sudhi ya Rodri. Mwandishi wa habari za michezo kutoka Italia, Nicolo Schira, amedai kuwa Rodri tayari amekataa ofa ya kuongeza mkataba Etihad kwa sababu anatamani kujiunga na ‘Los Blancos’, huku makubaliano binafsi yakielezwa kufikiwa kwa mkataba wa hadi mwaka 2030.

City wanamtaka Enzo Fernandez

Ili kuziba pengo lolote linaloweza kujitokeza, Manchester City wanaelezwa kuwa wanafikiria kufanya jaribio kubwa la kumsajili Enzo Fernandez kutoka Chelsea. Ingawa Chelsea walitumia kiasi kikubwa cha pesa kumsajili kiungo huyo mwaka 2023, mustakabali wake ndani ya Stamford Bridge bado haujajulikana rasmi, jambo linalowapa City mwanya wa kuingilia kati.

Chelsea inaripotiwa kuwa tayari kumuuza mchezaji huyo ikiwa watapata ofa inayozidi kiasi cha £106.9m walichokilipa kwa Benfica. Ikiwa usajili huu utafanikiwa, City watalazimika kutumia kiasi kikubwa cha pesa, kwani wana mipango mingine ya kusajili wachezaji kama Ayyoub Bouaddi, hali inayoweza kugharimu klabu hiyo zaidi ya £200m kwa wachezaji wote wawili.

Maoni ya Jody Morris kuhusu Enzo

Mustakabali wa Enzo ndani ya Chelsea umekuwa gumzo kubwa. Kocha na mchezaji wa zamani wa ‘The Blues’, Jody Morris, anaamini kuwa ikiwa mchezaji hataki kuendelea kusalia klabuni, basi ni vyema akaruhusiwa kuondoka, lakini kwa bei inayostahili.

“Ikiwa mtu hataki kuwa katika klabu ya soka, basi mruhusu aondoke. Kuruhusu aondoke hakumaanishi kumuachia kwa bei rahisi. Ikiwa watu hawataki kuwa Chelsea, ningependelea waondoke, bila kujali jinsi walivyocheza au jinsi unavyompenda mchezaji huyo,” alisema Morris.

Morris aliongeza kuwa huu unaweza kuwa muda mwafaka kwa Chelsea kupata kiasi kikubwa cha pesa kutoka kwa Enzo, kufuatia kiwango chake bora katika Kombe la Dunia, ili klabu iweze kurejesha gharama walizotumia kumsajili. Kwa sasa, mashabiki wanasubiri kuona kama kweli City watatekeleza azma yao ya kumnasa kiungo huyu wa kimataifa wa Argentina.