Manchester United katika sintofahamu ya JJ Gabriel

Mgogoro wa ghafla Old Trafford

Klabu ya Manchester United imekumbwa na mshtuko mkubwa baada ya kinda wao mahiri, JJ Gabriel, kuwasilisha ombi rasmi la kutaka kuvunja usajili wake na kuondoka klabuni hapo mara moja.

Kinda huyo mwenye umri wa miaka 15, ambaye anatazamwa kama mmoja wa vipaji bora zaidi nchini Uingereza, ameitaka klabu hiyo kumruhusu kuondoka ili awe mchezaji huru. Hatua hii imekuja kama mshangao mkubwa kwa uongozi wa ‘Mashetani Wekundu’ ambao hawakutarajia uamuzi kama huo kutoka kwa mchezaji ambaye wamekuwa wakimlea tangu akiwa na umri wa miaka 11.

Umahiri wa JJ Gabriel

JJ Gabriel ni mchezaji anayeweza kucheza kama mshambuliaji, winga wa kushoto, au kiungo mshambuliaji. Uwezo wake mkubwa umemfanya apate sifa nyingi kutoka kwa wakongwe wa klabu hiyo, akiwemo Ryan Giggs.

Akizungumzia kipaji cha kinda huyo, Giggs alisema:

“Hiyo inasikika kama Wayne (Rooney), sivyo? Ni yule anayesema ‘nipe mpira, nipe mpira’. Hajali anafanya mazoezi na nani.”

Giggs aliongeza kuwa Gabriel yupo mahali sahihi kwa maendeleo yake kutokana na historia ya klabu hiyo kuamini na kukuza vipaji vichanga, huku akisisitiza kuwa anazungukwa na watu sahihi kama Michael Carrick, Darren Fletcher na Jonny Evans.

United bado wana imani

Licha ya taarifa za kushtua, Manchester United haijakata tamaa. Ripoti zinaeleza kuwa klabu hiyo bado inaamini kuwa hali hiyo inaweza kutatuliwa. Kuna uvumi kuwa kumekuwa na changamoto katika uhusiano kati ya familia ya mchezaji na uongozi wa klabu, jambo ambalo limechangia uamuzi huo wa ghafla.

Kulingana na kanuni za soka, klabu haziwezi kuwapa wachezaji mikataba ya kitaalamu hadi wafikishe umri wa miaka 17, au mikataba ya usomi (scholarship) hadi wafikishe miaka 16—umri ambao Gabriel ataufikia Oktoba 6. Hii inawapa United nguvu ya kisheria ya kupinga ombi lake la kutaka usajili wake ufutwe.

Inafahamika kuwa United walikuwa na mpango wa kumjumuisha kijana huyo katika kikosi cha kwanza kwa ajili ya mchezo wa kesho, jambo linaloashiria imani kubwa waliyonayo kwake.