Manchester United kuleta mapinduzi makubwa safu ya ulinzi 2027: Wachezaji wanne hatarini

Mapinduzi ya INEOS yaendelea Old Trafford

Baada ya kufanya maboresho makubwa katika safu ya ushambuliaji mwaka 2025 na kuimarisha kiungo msimu huu, uongozi wa Manchester United chini ya kampuni ya INEOS umeelekeza nguvu zao kwenye safu ya ulinzi. Mipango ya sasa inaonyesha kuwa klabu hiyo inajipanga kusajili mabeki wapya wanne ifikapo mwaka 2027 ili kuimarisha kikosi hicho.

Hali hii inawafanya mabeki wanne ambao walisajiliwa kwa gharama ya jumla ya £210 milioni kuwa katika wakati mgumu. Wachezaji hawa wanatakiwa kuonyesha viwango vya juu msimu huu, vinginevyo watajikuta wakitafutiwa milango ya kutokea ili kupisha damu mpya.

Hatima ya Maguire, Martinez, De Ligt na Shaw

Taarifa kutoka vyombo mbalimbali vya habari nchini Uingereza zimebainisha kuwa wachezaji wanne wanaochunguzwa kwa karibu ni Harry Maguire, Lisandro Martinez, Matthijs de Ligt, na Luke Shaw.

• Luke Shaw: Mkataba wake unafikia tamati mwishoni mwa msimu huu bila chaguo la kuongezewa. Ingawa amekuwa na mchango mkubwa, umri wake na changamoto za utimamu wa mwili katika michezo mingi mfululizo zimewafanya mabosi wa United kusita kumpa mkataba mpya. United inahusishwa na mpango wa kumsajili Lewis Hall kutoka Newcastle kama mbadala wake.
• Lisandro Martinez na Harry Maguire: Wote wapo katika mwaka wa mwisho wa mikataba yao, ingawa klabu ina chaguo la kuongeza muda wa mwaka mmoja zaidi. Kwa Martinez, klabu inaweza kuamua kumuongezea mkataba ili kulinda thamani yake sokoni, lakini anaweza kuuzwa mwakani ikiwa hatakuwa na kiwango thabiti au atapata majeraha ya mara kwa mara.
• Matthijs de Ligt: Hali yake inategemea zaidi uwezo wake wa kurejea uwanjani na kuwa fiti. Mholanzi huyo amekuwa nje ya uwanja kwa muda mrefu kutokana na jeraha la mgongo, na klabu inataka kujiridhisha kuwa tatizo hilo limekwisha kabla ya kuamua hatima yake ya baadaye.

Nani yupo salama?

Licha ya mpango huo wa kusuka upya safu ya ulinzi, si wachezaji wote wapo hatarini. Wachezaji kama Noussair Mazraoui, Diogo Dalot, Leny Yoro, na Ayden Heaven wanaonekana kuwa katika mipango ya muda mrefu ya kocha na uongozi wa klabu.

Kwa sasa, mashabiki wa United wanatarajia kuona mabadiliko haya yakileta tija, huku wachezaji walio katika presha wakitakiwa kutumia kila fursa watakayopata uwanjani kuthibitisha kuwa bado wana nafasi katika kikosi cha The Red Devils.