Manchester United kumtaka David Raum kama mbadala wa Lewis Hall

United inatafuta suluhu beki ya kushoto

Manchester United inaendelea na mikakati yake ya kuimarisha kikosi katika dirisha hili la usajili, huku sasa kipaumbele kikiwa ni kupata beki wa kushoto mwenye uwezo mkubwa wa kushambulia ili kuleta ushindani kwa Luke Shaw.

Awali, klabu hiyo ilikuwa ikimfuatilia kwa karibu beki wa Newcastle United, Lewis Hall, kama chaguo lao namba moja. Hata hivyo, Newcastle wamesimama kidete na kuweka wazi kuwa mchezaji huyo hauzwi, jambo lililoilazimu United kugeukia maeneo mengine ili kutimiza malengo yao ya msimu huu.

David Raum ndiye chaguo jipya

Taarifa za hivi karibuni zinaeleza kuwa David Raum, beki wa kushoto wa RB Leipzig na timu ya taifa ya Ujerumani, sasa amekuwa chaguo kuu la Manchester United. Raum, mwenye umri wa miaka 28, anafahamika kwa uwezo wake mkubwa wa kukimbia upande mzima wa kushoto na kutoa pasi nyingi za mabao.

Takwimu zinaonyesha kuwa katika misimu mitatu iliyopita akiwa Leipzig, Raum ametoa jumla ya pasi 28 za mabao. Uwezo wake wa kupanda na kushuka umeleta matumaini makubwa kwa mashabiki wa United, hasa ikizingatiwa kuwa mchezaji huyo anajua vizuri namna ya kumlisha mipira Benjamin Sesko, ambaye wamewahi kucheza pamoja huko Ujerumani.

Faida kwa Benjamin Sesko

Ujio wa Raum unaonekana kuwa habari njema kwa mshambuliaji Benjamin Sesko. Uchambuzi kutoka The Athletic unaeleza kuwa Raum ni mmoja wa mabeki bora duniani kwa kupiga krosi za hatari zinazolenga kumfikia mshambuliaji.

“Benjamin Sesko anaweza kushuhudia ubora wa krosi za Raum. Wachezaji hawa wawili walishirikiana vyema huko nyuma, na uwezo wa Raum wa kukimbia kwa muda mrefu utamsaidia kukabiliana na mawinga wenye kasi kwenye ligi kuu ya England,” ilisema sehemu ya taarifa hiyo.

Msimu uliopita, Raum alikuwa nafasi ya tano miongoni mwa wachezaji wote kwenye ligi tano bora za Ulaya kwa kutengeneza nafasi nyingi, akitengeneza wastani wa nafasi 3.4 kwa kila mchezo. Uwezo wake wa kutumia mguu wa kushoto kupiga krosi zenye lengo umempa sifa ya kuwa beki anayejua kusoma mchezo na kutoa pasi sahihi.

Hali ya mkataba wake

Raum yupo katika mwaka wake wa mwisho wa mkataba na RB Leipzig. Ripoti kutoka Sky Germany zimeashiria kuwa thamani ya kipengele cha kumwachia mchezaji huyo (release clause) imeshuka na sasa iko chini ya Euro milioni 40, jambo linaloifanya dili hiyo kuwa nafuu zaidi kwa klabu yoyote inayotaka huduma yake.

Kwa sasa, Manchester United inaonekana kuwa makini katika kuhakikisha wanamaliza mapungufu yote kabla ya dirisha kufungwa, na David Raum anaonekana kuwa jina linaloweza kuleta mageuzi makubwa katika safu ya ulinzi ya klabu hiyo.