Manchester United kurejea mezani kwa Julian Ryerson, Tchouameni bado kitendawili

United yamtaka Julian Ryerson

Klabu ya Manchester United imeonyesha nia mpya ya kutaka huduma ya beki wa Borussia Dortmund, Julian Ryerson, kufuatia kiwango bora alichokionyesha kwenye michuano ya Kombe la Dunia. Beki huyu mwenye umri wa miaka 28 raia wa Norway, amekuwa kwenye rada za miamba hiyo ya Old Trafford huku mabosi wa INEOS wakitathmini chaguo mbalimbali za kuimarisha safu yao ya ulinzi.

Ryerson aliibuka kuwa gumzo baada ya kuonyesha kiwango safi katika ushindi wa Norway dhidi ya Brazil kwa mabao 2-1 katika hatua ya 16 bora ya michuano hiyo ya kimataifa. Inaelezwa kuwa kocha Michael Carrick ni miongoni mwa watu wanaovutiwa na uwezo wa mchezaji huyo, na sasa United wameambiwa wanapaswa kutenga kiasi kisichopungua Euro milioni 30 ili kuipata saini yake.

Changamoto za kumsajili Tchouameni

Wakati huohuo, ndoto ya Manchester United ya kutaka kumsajili kiungo mahiri wa Real Madrid, Aurelien Tchouameni, inaonekana kuwa na milima na mabonde. Ingawa United wanampenda sana mchezaji huyo na kumtazama kama mrithi sahihi wa Casemiro, mambo yanaonekana kuwa magumu.

Mchambuzi wa masuala ya usajili, Fabrizio Romano, ameweka wazi sababu mbili kuu zinazokwamisha dili hilo kwa sasa:

“Tchouameni anatazamwa kama mchezaji bora, ana utimamu wa akili wa hali ya juu na ni daraja la dunia. Hata hivyo, kuna changamoto ya mshahara wake mkubwa anaopokea Real Madrid. United wamebainisha kuwa ili mchezaji huyo ajiunge nao, lazima apunguze mshahara, jambo ambalo ni gumu.”

Sababu ya pili ni msimamo wa Real Madrid ambao hadi sasa hawajatoa ishara yoyote ya utayari wa kukaa meza moja na Manchester United ili kujadili uhamisho wa nyota huyo. Hali hii inafanya dili la Tchouameni kuwa na utata mkubwa, huku United wakiendelea na mikakati mingine ya kuimarisha kikosi chao.

United wanasaka nini?

Kama sehemu ya maboresho ya kikosi chini ya Sir Jim Ratcliffe na INEOS, Manchester United wanatarajiwa kufanya usajili wa maana kabla ya dirisha kufungwa. Tayari taarifa zinasema wako karibu kukamilisha usajili wa kiungo wa Atalanta, Ederson, ambaye atakuwa mchezaji wao wa kwanza msimu huu.

Lengo la United ni kuongeza angalau viungo wengine, beki wa pembeni, winga wa kushoto, na uwezekano wa kusajili beki wa kati au mshambuliaji kulingana na bajeti yao. Mashabiki wa United sasa wanasubiri kuona ni nani atatua Old Trafford katika siku chache zijazo.