Manchester United, City na Liverpool zashindana kusaka saini ya Yan Diomande

Usajili wa Diomande unazua utata nchini Uingereza

Winga matata wa RB Leipzig, Yan Diomande, amejikuta katikati ya vita kubwa ya usajili barani Ulaya. Huku kukiwa na taarifa za awali kuwa mchezaji huyo mwenye asili ya Ivory Coast alikuwa amepanga kujiunga na Paris Saint-Germain (PSG), sasa klabu za Ligi Kuu ya Uingereza (Premier League) zimeibuka na kutoa changamoto mpya.

Ripoti kutoka Ujerumani zinaeleza kuwa Manchester United na Manchester City wameungana na Liverpool katika kinyang’anyiro cha kutaka kumsajili kinda huyo mwenye umri wa miaka 19. Hali hii imeleta mkanganyiko mkubwa, huku kila klabu kati ya hizo tatu ikiamini kuwa wao ndio wapo kwenye nafasi nzuri (pole position) ya kukamilisha dili hilo.

Liverpool ilikuwa mstari wa mbele

Liverpool ilikuwa klabu ya kwanza kuonyesha nia thabiti, ikiripotiwa kuweka mezani ofa ya takriban Euro milioni 100 kwa ajili ya huduma ya Diomande. Hata hivyo, RB Leipzig imekuwa ngumu kumeza ikisisitiza kuwa mchezaji huyo hauzwi msimu huu, na wamepanga bei ya si chini ya Euro milioni 120 kwa yeyote anayehitaji huduma yake.

Licha ya ofa hiyo ya Liverpool, awali iliripotiwa kuwa mchezaji mwenyewe alikuwa ameshafikia makubaliano binafsi ya mkataba wa miaka mitano na PSG. Sababu zilizotajwa ni pamoja na mvuto wa mradi wa kocha Luis Enrique na mapenzi ya baba yake kwa klabu hiyo ya jijini Paris.

Mchezo bado mbichi

Ingawa kulikuwa na makubaliano ya mdomo kati ya Diomande na PSG, kuingilia kati kwa vigogo wa Uingereza kumeleta sura mpya. Mtaalamu wa masuala ya usajili, Fabrizio Romano, amebainisha kuwa Liverpool wamekuwa wakijaribu kushawishi msimamo wa mchezaji huyo, ingawa kwa sasa wanaonekana kusubiri kuona kama hali itabadilika.

Kwa upande wa Manchester United na Manchester City, wote wanatajwa kuwa tayari kuanza mazungumzo rasmi. Changamoto kubwa iliyopo kwa klabu zote zinazomnyatia ni msimamo wa RB Leipzig ambao hawataki kupokea ofa ya chini ya Euro milioni 120, huku kukiwa na taarifa kuwa hakuna klabu hata moja iliyo tayari kuvunja benki kwa kulipa zaidi ya Euro milioni 100 kwa wakati huu.

Sakata hili la Diomande linatarajiwa kuendelea kuwa gumzo katika dirisha hili la usajili, huku mashabiki wakisubiri kuona ni wapi kinda huyu atatua hatimaye.