Manchester United na mpango wao wa kushtukiza kuhusu beki wa kushoto

United kusubiri hadi msimu ujao

Manchester United wameonekana kuja na mkakati mpya na wa kushtukiza kuhusiana na nafasi ya beki wa kushoto. Kinyume na matarajio ya wengi kuwa klabu hiyo itajimudu kwenye dirisha la usajili la Januari ili kuziba pengo la Luke Shaw, ripoti zinaeleza kuwa mabosi wa Old Trafford wamepanga kusubiri hadi kufika kwa dirisha la usajili la majira ya joto mwakani.

Hali hiyo imekuja baada ya klabu hiyo kutumia nguvu kubwa na fedha nyingi kuboresha safu yao ya kiungo kwenye dirisha la usajili lililopita, hatua iliyofanya nafasi nyingine kama ya ulinzi kuwekwa pembeni kwa muda. Ingawa klabu ilihusishwa na wachezaji kadhaa akiwemo Lewis Hall wa Newcastle United, inaonekana uongozi wa INEOS umeamua kuwa na subira.

Kwa nini Januari si kipaumbele?

Mwandishi wa habari za michezo, Pete O’Rourke, amefafanua kuwa ni ngumu sana kwa klabu kupata wachezaji bora wanaowahitaji katikati ya msimu. Timu nyingi huwa haziko tayari kuachia nyota wao muhimu wakati ligi ikiwa inaendelea.

“Nina uhakika kuna mpango uliowekwa pale Old Trafford. Focus kubwa ilikuwa ni kujenga upya safu ya kiungo, jambo ambalo wamelifanya kwa usajili wao mpya. Itakuwa vigumu kupata malengo yao makuu kwenye dirisha la Januari, kwa sababu hakuna timu inayotaka kupoteza wachezaji wake bora katikati ya msimu,” alisema O’Rourke.

Mustakabali wa Luke Shaw

Tatizo la majeraha ya mara kwa mara kwa Luke Shaw limekuwa likiipa wakati mgumu United. Hata hivyo, klabu inaonekana kutafuta suluhisho la kudumu badala ya usajili wa haraka wa muda mfupi. Mwandishi Tyrone Marshall wa Manchester Evening News, amedokeza kuwa maamuzi ya Januari yatategemea sana hali ya afya ya wachezaji wao.

“Hii inategemea kabisa jinsi msimu unavyoendelea wakati huo. Ikiwa Shaw atabaki fiti na wengine wakijitokeza kuziba nafasi pale inapohitajika, basi usajili wa beki wa kushoto hautaonekana kuwa wa lazima. Kunaweza kuwa na hamu ya kuangalia soko la mikopo, lakini kipaumbele ni kupata beki wa kushoto wa muda mrefu, na hiyo ina uwezekano mkubwa kutokea msimu ujao wa joto,” aliongeza Marshall.

Kwa sasa, inaonekana mashabiki wa United hawapaswi kutarajia mabadiliko makubwa kwenye safu hiyo ya ulinzi wakati dirisha la Januari litakapofunguliwa, huku klabu ikijikita zaidi katika utulivu wa kikosi chao cha sasa.