Manchester United wanapewa nafasi kubwa kumsajili Louis Page kutoka Leicester

Mbio za kumsajili Louis Page zimepamba moto

Klabu ya Manchester United imetajwa kuwa mstari wa mbele katika kumsajili kiungo mahiri kijana kutoka Leicester City, Louis Page. Taarifa kutoka nchini Uingereza zinaeleza kuwa mashetani hao wekundu wapo kwenye nafasi nzuri ya kumnasa kinda huyo mwenye umri wa miaka 18.

Hali hiyo imekuja huku kukiwa na ushindani mkali kutoka kwa mahasimu wao kwenye ligi, Arsenal, ambao wanaripotiwa kuona ofa yao ya awali kwa mchezaji huyo ikikataliwa na uongozi wa Leicester City.

United wanamtaka Page kwa udi na uvumba

Chini ya umiliki wa INEOS, Manchester United wamekuwa wakionyesha nia ya kuimarisha safu yao ya kiungo ili kukabiliana na changamoto za Ligi Kuu ya England pamoja na michuano ya Ligi ya Mabingwa Ulaya msimu huu. Louis Page, ambaye ni mchezaji wa timu ya taifa ya England ya vijana wenye umri chini ya miaka 20 (U20), anaonekana kuwa chaguo muhimu kwa kocha Michael Carrick.

Ripoti kutoka kwa mwandishi Danyal Khan wa Sky Sports zinabainisha kuwa kijana huyo mwenyewe ana shauku kubwa ya kujiunga na Old Trafford. Inafahamika kuwa Page, ambaye alitwaa tuzo ya mchezaji kijana bora wa mwaka wa EFL (EFL Apprentice of the Year) msimu uliopita, ni shabiki wa muda mrefu wa Manchester United.

Arsenal wajaribu lakini wamekwama

Hata hivyo, Manchester United si wao pekee waliokuwa wakimwinda kinda huyo. Arsenal na Aston Villa zote zimekuwa zikifuatilia kwa karibu maendeleo ya mchezaji huyo ambaye tayari amecheza mechi zaidi ya 20 kwenye kikosi cha kwanza cha Leicester City.

“Manchester United na Arsenal zote zimefanya ofa kwa kiungo wa Leicester City, Louis Page. United ndio wanaopewa nafasi kubwa ya kumsajili mchezaji huyo wa U20 wa England, huku Page akionyesha nia ya kutaka kujiunga na Old Trafford,” kulingana na ripoti ya mwandishi Pete O’Rourke.

Taarifa zaidi zinaeleza kuwa ofa ya Arsenal imekataliwa na Leicester, huku mazungumzo yakiendelea kati ya pande husika ili kuona kama dili hilo linaweza kukamilika katika dirisha hili la usajili. Kwa sasa, Manchester United wanaonekana kuwa na nguvu kubwa zaidi katika mbio za kumnasa nyota huyu chipukizi.