Manchester United yafikia mwafaka na Manu Kone, sasa kujiandaa kutoa ofa ya Euro milioni 50

United inapania kumuimarisha Carrick

Klabu ya Manchester United imeendelea na harakati zake za kusuka upya kikosi chao kuelekea msimu ujao wa Ligi Kuu ya England na michuano ya Ligi ya Mabingwa Ulaya. Chini ya kocha Michael Carrick, klabu hiyo inaonekana kuwa na nia ya dhati ya kuongeza ubora katika eneo la kiungo, huku jina la Manu Kone likiwa kipaumbele kipya.

Taarifa kutoka nchini Italia, hasa kupitia gazeti la Corriere dello Sport, zinaeleza kuwa United tayari imefikia makubaliano ya awali na wawakilishi wa kiungo huyo wa kimataifa wa Ufaransa anayekipiga katika klabu ya AS Roma.

Ofa ya Euro milioni 50 mezani

Manchester United inajipanga kuwasilisha ofa rasmi ya kiasi cha Euro milioni 50 (takriban Pauni milioni 42.6) ili kupata huduma ya mchezaji huyo. Kone, ambaye alikuwa sehemu ya kikosi cha Ufaransa kilichofika nusu fainali ya Kombe la Dunia 2026, amekuwa akivutia pia vilabu kama Chelsea, Atletico Madrid, na Al-Ahli.

Ingawa makubaliano binafsi yameshafikiwa, ripoti zinaeleza kuwa kiasi hicho cha pesa kinaweza kisitosheleze mahitaji ya Roma, hivyo mazungumzo bado yanaendelea kati ya pande zote mbili.

Ufafanuzi wa Fabrizio Romano

Kwa upande wake, mtaalamu wa masuala ya usajili Fabrizio Romano amethibitisha kuwa kumekuwa na mawasiliano kati ya United na kambi ya mchezaji huyo, lakini akaweka wazi hali halisi ya soko:

“Kwa sasa, Manu Kone bado yupo kwenye orodha ya Manchester United, lakini hakuna ofa rasmi iliyotumwa Roma wala mazungumzo ya klabu kwa klabu. United inatakiwa kwanza kufanya uamuzi wa kiasi gani wanaweza kutumia kwa ajili ya kiungo mkabaji kabla ya kusonga mbele.”

Romano pia alikanusha tetesi zilizokuwa zikisambaa kuhusu bei ya mchezaji huyo kufikia Euro milioni 85-90, akisisitiza kuwa thamani halisi ya kiungo huyo wa Ufaransa ni ndogo zaidi ya hizo taarifa za kupikwa.

United inazidi kujijenga

Kama dili hili litakamilika, Manu Kone atakuwa kiungo wa tatu kusajiliwa na Michael Carrick msimu huu. Tayari United imekamilisha usajili wa Andrey Santos kutoka Chelsea kwa Pauni milioni 50, pamoja na Youri Tielemans aliyepatikana baada ya United kulipa kipengele cha kuvunja mkataba wake cha Pauni milioni 35 kutoka Aston Villa.

Kikosi cha Manchester United kinaonekana kuwa na malengo makubwa msimu ujao, huku Carrick akitaka kuona timu yake ikishindana vikali katika mbio za ubingwa wa Premier League.