Manchester United yafuatilia saini ya Alejandro Balde kutoka Barcelona

United yageukia soko la Hispania

Baada ya kuimarisha eneo la kiungo kwa kusajili wachezaji wapya kama Youri Tielemans na Andrey Santos, pamoja na kutarajiwa kwa Carlos Baleba, Manchester United sasa imehamishia nguvu zake katika kusaka beki mpya wa kushoto. Klabu hiyo imekuwa ikitafuta mchezaji wa kuimarisha nafasi hiyo, na sasa jina la nyota wa Barcelona, Alejandro Balde, limeanza kutajwa sana.

Awali, lengo kuu la Manchester United lilikuwa beki wa Newcastle United, Lewis Hall. Hata hivyo, Newcastle wamekataa katakata kumuuza mchezaji huyo, jambo lililowalazimu ‘Mashetani Wekundu’ hao kutazama maeneo mengine. Katika mchakato huo, United wamekuwa wakiwasiliana na wakala maarufu, Jorge Mendes, ili kujua uwezekano wa kumnasa Balde mwenye umri wa miaka 22.

Hali ilivyo kwa Balde na Barcelona

Mtaalamu wa masuala ya usajili, Fabrizio Romano, amebainisha kuwa dili hili lipo katika hali ya ‘50 kwa 50’. Hii inamaanisha kuwa uwezekano wa mchezaji huyo kutua Old Trafford unategemea sana msimamo wa klabu yake ya Barcelona.

Kupitia channel yake ya YouTube, Romano alifafanua:

“Kwa upande wa Balde, hali ni 50 kwa 50, kwa sababu ikitokea ofa nzuri, Balde anaweza kuondoka Barcelona. Lakini ninachoweza kukuambia ni kwamba mchezaji mwenyewe haonyeshi dalili za kutaka kuondoka kwa shinikizo.”

Romano aliongeza kuwa Balde anafurahia maisha yake ndani ya Camp Nou na angependelea kupigania nafasi yake kikosini. Hata hivyo, mlango wa kuondoka unaweza kufunguka ikiwa tu uongozi wa Barcelona utaamua kumuuza ili kujiimarisha kiuchumi au kwa sababu nyingine za kimkakati.

United bado haijatuma ofa rasmi

Ingawa kumekuwa na mazungumzo kati ya Manchester United na wakala Jorge Mendes ili kujua mazingira ya dili hilo, Romano amethibitisha kuwa mpaka sasa hakuna ofa rasmi ambayo imewasilishwa mezani kwa Barcelona.

United inaonekana kuwa makini katika hatua zake. Mbali na Balde, klabu hiyo pia imekuwa ikihusishwa na mabeki wengine wenye thamani nafuu zaidi kama Joaquin Seys kutoka Club Brugge na Jorge Salinas wa Racing Santander.

Kwa sasa, mashabiki wa United wanabaki kusubiri kuona kama klabu yao itafanikiwa kumshawishi beki huyo wa Barcelona au kama watalazimika kugeukia chaguo jingine kabla ya dirisha la usajili kufungwa.