Manchester United yaitolea nje ofa ya kumsajili Jules Kounde kutoka Barcelona

United yajielekeza kwingine

Klabu ya Manchester United imethibitisha kutokuwa na mpango wa kumsajili beki wa Barcelona na timu ya taifa ya Ufaransa, Jules Kounde, licha ya mchezaji huyo kupewa ofa ya kujiunga na miamba hiyo ya Old Trafford.

Taarifa za ndani zinaeleza kuwa mawakala wamekuwa wakiwasiliana na vilabu mbalimbali barani Ulaya ili kujaribu kupata timu itakayomchukua beki huyo mwenye umri wa miaka 27, ambaye ana mshahara wa takriban pauni 200,000 kwa wiki. Barcelona inatajwa kuwa tayari kumuuza Kounde kwa kiasi kisichopungua Euro milioni 50.

Hata hivyo, uongozi wa Manchester United chini ya INEOS umeamua kutofanya usajili huo. Sababu kuu ya uamuzi huo ni kipaumbele cha kocha Michael Carrick kuimarisha eneo la beki wa kushoto badala ya kuongeza mchezaji mwingine katika beki ya kulia ambapo tayari ana Diogo Dalot na Noussair Mazraoui.

Kipaumbele ni kiungo

Kwa sasa, Manchester United inaonekana kuelekeza nguvu zake zote katika kuimarisha safu ya kiungo. Ingawa tayari klabu hiyo ina makubaliano na Atalanta kwa ajili ya kiungo Ederson Silva, inaonekana kocha Carrick bado anahitaji nyongeza nyingine ya kiungo wa kiwango cha juu.

Baada ya kukosa saini za wachezaji kama Elliot Anderson, Sandro Tonali, na Mateus Fernandes, ripoti zinaeleza kuwa United sasa inamuangalia kwa ukaribu kiungo wa Real Madrid, Aurelien Tchouameni, pamoja na nyota wa Bournemouth, Alex Scott.

Hali ya Alex Scott

Kuhusu Alex Scott, mchambuzi wa masuala ya usajili, Fabrizio Romano, amebainisha kuwa kiungo huyo anawaniwa na vilabu vikubwa ikiwemo Arsenal na Manchester United.

“Alex Scott ni mmoja wa wachezaji wanaofuatiliwa sana ndani ya Arsenal na Man Utd. Klabu zote mbili zinampenda mchezaji huyo. Kwa sasa, Bournemouth wanasisitiza kuwa hatoki, lakini kama watabadili msimamo na kufungua milango ya mazungumzo kwa dau nono, tutalazimika kufuatilia vilabu hivi viwili vinavyomuhitaji,” alisema Romano.

Wakati dirisha la usajili likiendelea, mashabiki wa United wanazidi kusubiri kuona ni nani atakayekuwa mchezaji ajaye kutua Old Trafford kuimarisha kikosi hicho kinachojiandaa na changamoto za msimu mpya.