Manchester United yajipanga kumsajili Aurelien Tchouameni kutoka Real Madrid

United yamtaka Tchouameni

Manchester United imedhamiria kufanya maboresho makubwa kwenye kikosi chake msimu huu, na sasa taarifa zinaeleza kuwa klabu hiyo inajipanga kuanza mazungumzo na Real Madrid ili kumsajili kiungo mkabaji, Aurelien Tchouameni.

Kocha wa United, Michael Carrick, anaonekana kuwa na nia ya kuimarisha eneo lake la kiungo. Ripoti kutoka nchini Hispania zinasema kuwa miamba hiyo ya Old Trafford iko tayari kutoa kiasi kikubwa cha pesa ili kumnasa mchezaji huyo, ambaye anaonekana kama chaguo sahihi zaidi la kuziba pengo la Casemiro ndani ya kikosi hicho.

Changamoto za usajili huu

Licha ya United kuvutiwa sana na kiwango cha mchezaji huyu wa kimataifa wa Ufaransa, kuna changamoto mbili kubwa ambazo zinaweza kukwamisha dili hilo. Mchambuzi wa masuala ya usajili, Fabrizio Romano, amebainisha kuwa Real Madrid bado haijawa tayari kumwachia mchezaji huyo.

“United wana imani kubwa na Tchouameni na wanamchukulia kama mchezaji mkamilifu kwa mahitaji yao. Hata hivyo, Real Madrid bado hawajafungua mlango wa kumruhusu kuondoka, na kuna suala la mshahara wake mkubwa ambao United inapaswa kuzingatia,” alisema Romano.

Dau kubwa mezani

Habari kutoka gazeti la AS la Hispania zinasema kuwa Manchester United iko tayari kuweka dau nono mezani ili kukamilisha usajili huu, ambao unaweza kuwa mmoja wa mikataba mikubwa zaidi katika dirisha hili la usajili. Hata hivyo, inakadiriwa kuwa Real Madrid haitakuwa tayari kumwachia kiungo huyo kwa chini ya Euro milioni 100.

Kwa upande wake, Tchouameni mwenye umri wa miaka 26, ambaye kwa sasa yupo katika majukumu ya timu ya taifa kwenye Kombe la Dunia 2026, amekuwa na maisha mazuri Santiago Bernabeu na ameshinda mataji muhimu kama La Liga, Copa del Rey, na Ligi ya Mabingwa Ulaya. Mpaka sasa, mchezaji huyo mwenyewe anaonekana kutamani kuendelea kubaki Madrid.

Ingawa usajili huu unaonekana kuwa mgumu kwa sasa, Manchester United inaonekana kuwa na nia ya dhati ya kufanya kila liwezekanalo ili kuhakikisha wanapata huduma ya staa huyu kabla ya dirisha la usajili kufungwa.