Manchester United wapata dhahabu: Tynan Thompson atabiriwa makubwa Old Trafford

Mashabiki wa Manchester United wana kila sababu ya kutabasamu baada ya klabu yao kufanikiwa kumnasa chipukizi mwenye kipaji kikubwa, Tynan Thompson, kutoka kwa wapinzani wao wa Ligi Kuu ya England, Tottenham Hotspur.

Thompson, mwenye umri wa miaka 18, ni mshambuliaji wa pembeni (winger) ambaye uwezo wake umewashangaza wengi, huku wachambuzi wakikosoa uamuzi wa Tottenham wa kumruhusu kijana huyu kuondoka.

Uwezo mkubwa uwanjani

Tynan Thompson anafahamika kwa uwezo wake wa kutokea pembeni na kuingia katikati ili kupiga mashuti kwa mguu wake wa kulia. Uwezo wake wa kutumia miguu yote miwili umewafanya maskauti wa Manchester United kumtaja kama mchezaji anayekuwa mgumu sana kwa mabeki kumdhibiti.

Takwimu zake za msimu uliopita akiwa na timu ya vijana ya Spurs chini ya miaka 18 zinazungumza wenyewe: amefunga mabao 22 na kutoa pasi 12 za mabao katika michezo 55 aliyoicheza. Aidha, tayari amepata bahati ya kuwakilisha timu ya vijana ya England chini ya miaka 18 mara saba.

Kwa nini Spurs wamemwachia?

Mchambuzi wa soka la vijana wa Tottenham, John Wenham, ameelezea masikitiko yake juu ya kuondoka kwa kinda huyo, akidai kuwa klabu hiyo haikumpa nafasi ya kutosha licha ya kuonyesha kiwango bora kila wiki.

Tynan Thompson hakupewa nafasi kabisa, alikuwa akifunga kila wiki kwenye timu ya U21. Spurs hawakuwa na winger wa kushoto kutokana na majeraha na wachezaji wengine kuwa kwa mkopo, lakini Tynan alikuwa akipuuzwa tu.

Wakati ikiripotiwa kuwa Thompson alikataa mkataba mpya Januari mwaka huu kwa sababu za kifamilia, wapo wanaoamini kuwa aliondoka kwa sababu ya kukosa njia ya wazi ya kupenya kwenda kwenye kikosi cha kwanza cha Spurs.

Mustakabali wake United

Manchester United wamemsajili nyota huyo kwa ada ya pauni milioni 4, huku kukiwa na nyongeza nyingine ya pauni milioni 4 ikitegemea kiwango chake. Tottenham pia wameweka kipengele cha kupata asilimia 15 ya mauzo yake ya baadaye.

Kwa sasa, Thompson anafanya mazoezi na kikosi cha U21 cha Manchester United, lakini kutokana na ukosefu wa usajili mkubwa wa winga wa kushoto katika dirisha hili, kuna uwezekano mkubwa akapata nafasi ya kujaribiwa na kocha Michael Carrick katika kikosi cha kwanza msimu huu.

Kama atafanikiwa kuendeleza kiwango chake bora, bila shaka Tottenham watakuwa wamejuta kupoteza lulu hii ambayo ilikuwa inakua ndani ya kuta zao.