Manchester United yatoa uamuzi mzito kuhusu hatma ya Mason Greenwood

United yagoma kumrudisha Greenwood

Klabu ya Manchester United imeweka wazi msimamo wake kuhusu mshambuliaji Mason Greenwood, ikithibitisha kuwa haitafanya jitihada zozote za kumrejesha mchezaji huyo kikosini mwao. Uamuzi huu umekuja baada ya klabu ya Olympique Marseille kuwasiliana na mashetani hao wekundu ili kujua kama wangependa kutumia kipengele cha kumnunua tena (buy-back clause) mchezaji huyo.

Greenwood, ambaye aliondoka Old Trafford na kujiunga na Marseille mwaka 2024 baada ya kutumikia msimu mmoja wa mkopo nchini Hispania katika klabu ya Getafe, amekuwa na kiwango bora sana akiwa Ufaransa. Katika misimu miwili aliyokaa Marseille, mchezaji huyo mwenye umri wa miaka 24 amefanikiwa kufunga mabao 48 na kutoa pasi 17 za mabao katika michezo 81 aliyoichezea timu hiyo.

Safari ya kwenda Uturuki

Mtaalamu wa masuala ya usajili, Fabrizio Romano, amebainisha kuwa Marseille tayari imefikia makubaliano na klabu ya Fenerbahce ya nchini Uturuki kwa ajili ya uhamisho wa Greenwood. Hata hivyo, kabla ya kukamilisha dili hilo, Marseille ilikuwa na wajibu wa kuitaarifu Manchester United, kutokana na makubaliano ya awali yaliyokuwa na kipengele cha kuruhusu United kumsajili tena mchezaji huyo ikihitaji.

“Manchester United imewaambia Marseille kuwa haitapiga kura ya kutumia kipengele cha kumrudisha Mason Greenwood. Klabu inabaki na asilimia zake za mauzo ya baadaye (sell-on clause) lakini haitamburudisha mchezaji huyo,” Romano alieleza kupitia mitandao yake.

Uchu wa Al-Ahli

Ingawa dili la kuelekea Fenerbahce linaonekana kukaribia ukingoni, taarifa kutoka kwa mwandishi wa mambo ya usajili, Ben Jacobs, zinaonyesha kuwa kulikuwa na jaribio la dakika za mwisho kutoka klabu ya Al-Ahli ya nchini Saudi Arabia. Klabu hiyo ilijaribu kuingilia kati mazungumzo hayo kwa kumshawishi mchezaji mwenyewe, hata hivyo, Fenerbahce bado wanaonekana kuwa na matumaini makubwa ya kukamilisha dili hilo.

Manchester United inatarajia kunufaika na kiasi cha paundi milioni 10 kupitia kipengele cha asilimia ya mauzo (sell-on clause) kilichowekwa kwenye mkataba wa awali wakati ikimuuza mchezaji huyo kwenda Marseille. Kwa sasa, pande zote zinamsubiri mchezaji mwenyewe atoe idhini ya mwisho ili safari yake kuelekea Istanbul kukamilike rasmi.