Michael Carrick katika presha nzito Manchester United, mabosi waanza kutafuta mbadala

Presha inazidi kupanda Old Trafford

Kiti cha Michael Carrick kama kocha mkuu wa Manchester United kinaonekana kuanza kutikiswa kufuatia mfululizo wa matokeo yasiyoridhisha mwanzoni mwa msimu huu. Ingawa alipewa mkataba wa kudumu baada ya kuonyesha kiwango kizuri kama kocha wa muda msimu uliopita na kuisaidia timu hiyo kumaliza katika nafasi ya tatu na kufuzu Ligi ya Mabingwa Ulaya, hali imebadilika kwa haraka.

Manchester United wameanza msimu huu kwa kusuasua, wakishinda michezo miwili pekee kati ya sita waliyocheza katika mashindano yote. Hali imekuwa mbaya zaidi baada ya kupoteza michezo miwili mfululizo, ikiwemo kipigo cha 1-0 dhidi ya Manchester City waliokuwa na wachezaji 10, na kichapo cha 3-2 dhidi ya Brighton katika Kombe la Carabao baada ya kuwa mbele kwa mabao 2-0.

Uongozi wa Man Utd wafanya tathmini ya siri

Ripoti kutoka kwa mwandishi Ben Jacobs zinaashiria kuwa uongozi wa klabu hiyo hauna imani kamili na Carrick kwa sasa. Inasemekana kuwa mabosi wa United wameanza kufanya tathmini ya kina (due diligence) ili kujiandaa na uwezekano wa kufanya mabadiliko ya benchi la ufundi ikiwa matokeo hayataimarika.

Akizungumza na United Stand, Jacobs alidokeza kuwa Carrick hana uungwaji mkono wa moja kwa moja kutoka kwa viongozi wa juu wa klabu hiyo. Alisema:

“Sina uhakika kama kuna uungwaji mkono wa dhati kwa Carrick, kusema kweli. Manchester United wanafanya tathmini ya kina ili kujiandaa ikiwa watalazimika kufanya mabadiliko.”

Nani anaweza kuchukua mikoba ya Carrick?

Kulingana na Jacobs, hali ya sasa ni ngumu na isiyotabirika, hasa kutokana na ukweli kwamba makocha wengi ambao walikuwa hawapatikani mwishoni mwa msimu uliopita, sasa wako huru au wanaweza kupatikana. Miongoni mwa majina yanayotajwa kuwa kwenye rada za United ni Julian Nagelsmann, Thomas Tuchel, Eddie Howe, Kieran McKenna, na Unai Emery.

Kibarua cha Carrick kinaonekana kuwa na uzito mkubwa katika mchezo ujao dhidi ya Fulham kabla ya mapumziko ya kimataifa. Kushindwa kupata alama tatu katika mchezo huu kunaweza kuharakisha maamuzi ya uongozi wa klabu hiyo kuhusu mustakabali wake.

Kwa sasa, macho ya mashabiki wa “Mashetani Wekundu” yanaelekezwa kwenye uwanja wa mazoezi na mchezo wa wikendi hii, huku kukiwa na hofu kuwa huenda Carrick akawa na muda mfupi sana wa kurekebisha mambo kabla ya jembe lingine kutafutwa.